ئامېرىكا خىتايغا قويغان باجنى %145 كە چىقاردى

خىتاي ئامېرىكا ماللىرىغا %50 باج قوشۇپ ئۆچ ئالغاندىن كېيىن، ئامېرىكا خىتايغا قاراتقان تاموژنا بېجىنى %125 كە چىقارغان بولۇپ، ئاقساراي بۇنىڭ دەسلەپكى قەدەمدە قويۇلغان باجنى ئۆز ئىچىگە ئالمايدىغانلىقىنى بىلدۈردى.

خىتاي ئامېرىكىنىڭ بېكىتكەن مۇددىتىگە پىسەنت قىلماي، 9-ئاپرېل ئامېرىكا ماللىرىغا يەنە %50 باج قوشۇپ، ئومۇمىي باج مىقدارىنى %84 كە يەتكۈزگەندىن كېيىن، ئامېرىكا پىرېزىدېنتى دونالد تىرامپ خىتايغا قارىتىلغان ئومۇمىي باجنى %104 تىن بىراقلا %125 كە ئۆستۈرگەنىدى ۋە دەرھال كۈچكە ئىگە ئىكەنلىكىنى ئېلان قىلغانىدى. ئاقساراي بۇ ھەقتە چۈشەنچە بېرىپ، بۇنىڭ 2-ئايدا قويۇلغان باجنى ئۆز ئىچىگە ئالمايدىغانلىقىنى بىلدۈردى. بۇنىڭ بىلەن ئامېرىكا ھۆكۈمىتى خىتايغا قويغان باج %145 كە يەتتى.

خىتاي تىرامپ ھۆكۈمىتىنىڭ بۇ ھەرىكىتىدىن ئۆچ ئېلىش ئۈچۈن، 12-ئاپرېلدىن تارتىپ ئامېرىكا ماللىرىدىن ئېلىنىدىغان باجنىڭ %84 تىن %125 كە ئۆستۈرۈلگەنلىكىنى ئېلان قىلدى ۋە ئامېرىكا بىلەن ئاخىرىغىچە تۇتىشىدىغانلىقى ھەققىدە جار سالدى.

سودا ئۇرۇشىنىڭ كۈچىيىشى دۇنيا ئىقتىسادىغا زور تەسىر كۆرسىتىۋاتقان بولۇپ، پاي چېكى بازىرىدا زور داۋالغۇش كۆرۈلمەكتە.