ئالدىنقى پەسىلدە ئالاتاۋ ئېغىزىدىن توشۇلغان ماللار داۋاملىق كۆپەيگەن

خىتاي شەرقىي تۈركىستاننىڭ ھەر قايسى چېگرا ئېغىزلىرىدىن مەجبۇرىي ئەمگەك مەھسۇلاتلىرىنى چەت ئەلگە توشۇش مىقدارىنى داۋاملىق زورايتىۋاتقان بولۇپ، ئالدىنقى پەسىلدە يەنە ئېشىش كۆرۈلگەن.

خىتاي مەركىزىي رادىيو ئىستانسىسىنىڭ 3-ئاپرېل خەۋەر قىلىشىچە، بۇ يىل بىرىنچى پەسىلدە شەرقىي تۈركىستاندىكى ئالاتاۋ چېگرا ئېغىزىدىن ئۆتكەن مال مىقدارى 4 مىليون 200 مىڭ توننىغا يېتىپ، بۇلتۇرقى ئوخشاش مەزگىلدىكىدىن %7.4 ئاشقان.

مەلۇم بولۇشىچە، نۆۋەتتە ئالاتاۋ تۆمۈريول چېگرا ئېغىزى ئارقىلىق قاتنايدىغان خىتاي − ياۋروپا نۆۋەتچى پويىز لىنىيەسى 123 كە يەتكەن بولۇپ، گېرمانىيە، پولشا قاتارلىق 21 دۆلەت ۋە رايونغا تۇتىشىدىكەن. توشۇلۇۋاتقان مەھسۇلاتلارنىڭ تۈرلىرى 200 خىلدىن ئاشىدىكەن.

شەرقىي تۈركىستاندىكى ئالاتاۋ، قورغاس قاتارلىق چېگرا ئېغىزلىرىدىن چەت ئەلگە قاتناۋاتقان پويىز قېتىم سانى ئىزچىل ئېشىپ ماڭغان بولۇپ، ئۇيغۇر مەجبۇرىي ئەمگىكى مەھسۇلاتلىرى داۋاملىق ئاسىيا، ياۋروپا ئەللىرىگە توشۇلغان. 2024-يىلى ئالاتاۋ تۆمۈريول چېگرا ئېغىزى ئارقىلىق قاتنىغان خىتاي − ياۋروپا (ئوتتۇرا ئاسىيا) نۆۋەتچى پويىزى 7684 قېتىم بولۇپ، 2023 ـ يىلىدىكىدىن %15.8 ئاشقان؛ قورغاس تۆمۈريول چېگرا ئېغىزى ئارقىلىق قاتنىغان خىتاي − ياۋروپا (ئوتتۇرا ئاسىيا) نۆۋەتچى پويىزى 8730 قېتىم بولۇپ، 2023-يىلىدىكىدىن %12.5 ئاشقان. ئوتتۇرا ھېساب بىلەن ھەر ئىككى سائەتتە بىر نۆۋەتچى پويىز قاتنىغان.

خىتاي يېقىنقى يىللاردىن بېرى خەلقئارانىڭ بېسىمى ۋە بىر قىسىم دۆلەتلەرنىڭ جازا، چەكلىمىلىرىگە قارىماي، شەرقىي تۈركىستاندىكى ئىرقىي قىرغىنچىلىق جىنايىتىنى داۋاملاشتۇرۇۋاتقان بولۇپ، مەجبۇرىي ئەمگەك مەھسۇلاتلىرىنىڭ ھەرقايسى دۆلەتلەرگە، ھەتتا ياۋروپا بازارلىرىغا داۋاملىق ئېقىپ كىرىۋاتقانلىقى ھەققىدە دوكلاتلار ئېلان قىلىنماقتا.