خىتاي فىلىپپىندىكى پۇقرالىرىنى ئاگاھلاندۇرۇشقا مەجبۇر بولدى

يېقىنقى مەزگىللەردە فىلىپپىن دائىرىلىرىنىڭ خىتايلار ۋە خىتاي شىركەتلىرىنى تەكشۈرۈش ئەھۋالى كۆپەيگەن بولۇپ، خىتاي ئەلچىخانىسى بۇ ھەقتە ئاگاھلاندۇرۇش ئۇقتۇرۇشى تارقىتىشقا مەجبۇر بولدى.

خىتاينىڭ فىلىپپىندا تۇرۇشلۇق باش ئەلچىخانىسى 1-ئاپرېل ئۇقتۇرۇش تارقىتىپ، فىلىپپىندىكى خىتاي پۇقرالىرى ۋە فىلىپپىنغا بارماقچى بولغان خىتاي پۇقرالىرىنى بىخەتەرلىككە دىققەت قىلىش ھەققىدە ئاگاھلاندۇرغان.

ئۇقتۇرۇشتا فىلىپپىن قانۇن ئىجرا قىلىش ئورگانلىرىنىڭ يېقىنقى مەزگىللەردە خىتايلارغا ۋە خىتاي شىركەتلىرىگە قارىتا تەكشۈرۈش، چاتاق چىقىرىش ھەرىكەتلىرىنىڭ كۆپلەپ يۈز بېرىۋاتقانلىقى، شۇنداقلا فىلىپپىندا سىياسىي يىغىلىش ۋە نامايىشلارنىڭ كۆپەيگەنلىكى، بۇ سەۋەبلىك فىلىپپىندىكى خىتاي پۇقرالىرى ۋە شىركەت، ئورگانلىرىغا نىسبەتەن خېيىم-خەتەرنىڭ زورايغانلىقى، بۇلارنى كۆزدە تۇتۇپ، خىتايلارنى ئامال بار سىرتقا كۆپ چىقماسلىققا تەۋسىيە قىلىدىغانلىقى بىلدۈرۈلگەن.

يېقىنقى مەزگىللەردە خىتاي بىلەن فىلىپپىننىڭ دېڭىز رايونىدىكى سۈركىلىش، توقۇنۇش ۋەقەلىرى كۆپلەپ يۈز بەرگەن بولۇپ، جىددىيچىلىك بارغانسېرى كۈچەيگەن. بۇنىڭ بىلەن بىرگە، خىتاي رېجىمىنىڭ فىلىپپىندىكى جاسۇسلۇق ھەرىكەتلىرى، شۇنداقلا خىتايلارنىڭ ئادەم ئەتكەسچىلىكى، تور ئالدامچىلىقى، پۇل يۇيۇش، ساختا شىفىرلىق پۇل سېتىش قاتارلىق جىنايەتلىرى ئارقا-ئارقىدىن پاش بولۇپ، نۇرغۇنلىغان خىتايلار قولغا ئېلىنغان.