ئاۋسترالىيەدە نەچچىلىگەن كۇڭزى ئىنستىتۇتى تاقالدى

ئاۋسترالىيەدىكى ئالتە ئۇنىۋېرسىتېت ئۆز قارمىقىدىكى كۇڭزى ئىنستىتۇتلىرىنى تاقىغان بولۇپ، ئۇلار خىتاي رېجىمىغا چېتىشلىق دەپ قارىلىپ كەلگەن كۇڭزى ئىنستىتۇتلىرى بىلەن ھەمكارلىق كېلىشىمىنى ئۇزارتمىغان.

ئاۋسترالىيە ABC قانىلىنىڭ 2-ئاپرېلدىكى خەۋىرىدە بىلدۈرۈلۈشىچە، ئاۋسترالىيەدىكى مېلبورن ئۇنىۋېرسىتېتى، كىۋىنسلاند ئۇنىۋېرسىتېتى، يېڭى جەنۇبىي ۋېلس ئۇنىۋېرسىتېتى، غەربىي ئاۋسترالىيە ئۇنىۋېرسىتېتى... قاتارلىق ئۇنىۋېرسىتېتلار ئۆز قارمىقىدىكى كۇڭزى ئىنستىتۇتلىرى بىلەن بولغان ھەمكارلىق كېلىشىمىنى قايتا ئىمزالىماسلىقنى قارار قىلغان.

ئاۋسترالىيە ھۆكۈمىتى يېقىنقى يىللاردا كۇڭزى ئىنستىتۇتلىرىغا قارىتا نازارەتنى كۈچەيتكەن بولۇپ، ئىككى يىل ئىلگىرى ئۇنىۋېرسىتېتلارنىڭ يېڭى كۇڭزى ئىنستىتۇتى تەسىس قىلىشىنى چەكلىگەن. گەرچە ئۆتكەن بەش يىلدا ئاۋسترالىيەدىكى كۇڭزى ئىنستىتۇتلىرىنىڭ سانى يېرىمى دېگۈدەك ئازايغان بولسىمۇ، ئاۋسترالىيەدىكى يەنە يەتتە ئۇنىۋېرسىتېتتا كۇڭزى ئىنستىتۇتلىرىنىڭ يەنىلا نورمال پائالىيەت قىلماقتىكەن.

كۇڭزى ئىنستىتۇتلىرى خىتاي تىلى ۋە مەدەنىيىتى ھەققىدىكى دەرسلەرنى ئۆتىدىغانلىقىنى دەۋا قىلسىمۇ، مەزكۇر ئورۇنلارنىڭ خىتاي رېجىمى بىلەن قويۇق مۇناسىۋىتى بارلىقى تەكىتلىنىپ، شۇنداقلا ئاۋسترالىيەدىكى خىتاي ئوقۇغۇچىلارنى نازارەت قىلىش، خىتاينىڭ مەنپەئەتىگە پايدىلىق پىكىرلەرنى، ئۇچۇرلارنى تارقىتىش بىلەن ئەيىبلىنىپ كەلگەن.

كۇڭزى ئىنستىتۇتى ئىزچىل ھالدا خىتاينىڭ خەلقئارادىكى يۇمشاق كۈچى ۋە تەسىرىنى زورايتىش قورالى دەپ قارىلىپ كەلگەن بولۇپ، بۇ سەۋەبلىك يېقىنقى يىللاردا ئامېرىكا ۋە كۆپلىگەن ياۋروپا دۆلەتلىرى كۇڭزى ئىنستىتۇتلىرىنى تاقاشقا باشلىغان. جۈملىدىن شىۋېتسىيە ياۋروپادىكى كۇڭزى ئۇنىۋېرسىتېتىنى تولۇق تاقىغان، شۇنداقلا خىتاي تىلى دەرسلىك پىروگراممىسىنى پۈتۈنلەي ئەمەلدىن قالدۇرغان تۇنجى دۆلەت بولۇپ قالغان.

خىتاي بولسا 2020-يىلى كۇڭزى ئىنستىتۇتلىرىنىڭ باشقۇرۇش ھوقۇقىنى مائارىپ مىنىستىرلىقىدىن خەلقئارالىق خىتاي تىلى مائارىپ فوندى نامىدىكى بىر ئاتالمىش «ھۆكۈمەتكە تەۋە ئەمەس تەشكىلات»قا يۆتكەپ، بېسىم ۋە ئەيىبلەشلەرنى يوقىتىشقا ئۇرۇنۇپ باققان.