ئۇيغۇر ماھىر خىتايلارنىڭ ئۇزۇن يىللىق رېكورتىنى بۇزدى

ئۇيغۇرلاردىن چىققان دىسكا ئېتىش ماھىرى ئابدۇغېنى تۇرغۇن چېڭدۇ شەھىرىدە ئۆتكۈزۈلگەن تەنھەرىكەت مۇسابىقىسىدە خىتايلارنىڭ 29 يىلدىن بۇيان ساقلىنىپ كەلگەن رېكورتىنى بۇزۇۋەتتى.

خىتاي تاراتقۇلىرىنىڭ خەۋەر قىلىشىچە، دىسكا ئېتىش تۈرىدىكى ئۇيغۇر ماھىر ئابدۇغېنى تۇرغۇن خىتاينىڭ چېڭدۇ شەھىرىدە ئۆتكۈزۈلگەن 2025-يىللىق دۆلەتلىك يېنىك ئاتلېتىكا مۇسابىقىسىنىڭ ئېتىش تۈرىگە قاتناشقان بولۇپ، 2-ئاپرېل دىسكا ئېتىشتا 65.35 مېتىرلىق نەتىجە بىلەن، خىتايلارنىڭ 1996-يىلىدىن بۇيان ساقلىنىپ كەلگەن رېكورتىنى بۇزۇپ تاشلىغان.

28 ياشلىق ئۇيغۇر تەنھەرىكەتچى ئابدۇغېنى تۇرغۇن قەشقەر ۋىلايىتىنىڭ كونىشەھەر ناھىيەسىدىن بولۇپ، 16 يېشىدىن باشلاپ مەخسۇس تەربىيەلىنىشكە باشلىغان. بۇ ئابدۇغېنى تۇرغۇننىڭ تۇنجى قېتىم ياخشى نەتىجىگە ئېرىشىشى ئەمەس بولۇپ، ئۇ خىتاينىڭ 14-نۆۋەتلىك مەملىكەتلىك تەنھەرىكەت مۇسابىقىسى، 2023-يىللىق مەملىكەتلىك يېنىك ئاتلېتىكا چېمپىيونلۇق مۇسابىقىسى، 2024-يىللىق مەملىكەتلىك يېنىك ئاتلېتىكا چېمپىيونلۇق مۇسابىقىسى ۋە 2024-يىللىق مەملىكەتلىك يېنىك ئاتلېتىكا لەۋھە تالىشىش مۇسابىقىلىرىنىڭ ھەممىسىدە چېمپىيونلۇققا ئېرىشكەن.

گەرچە خىتاي شەرقىي تۈركىستاندا ئۇيغۇرلار ۋە باشقا تۈركىي خەلقلەرگە ئىرقىي قىرغىنچىلىق يۈرگۈزۈۋاتقان بولسىمۇ ۋە تۈرلۈك ساھەلەردە چەكلەپ، باش كۆتۈرگۈزمەي كەلگەن بولسىمۇ، قاتتىق بېسىم ئاستىدا يەنە نۇرغۇنلىغان مۇنەۋۋەر تەنھەرىكەتچىلەر يېتىشىپ چىقىپ، پۇتبول، يۈگۈرۈش، بوكسيورلۇق... قاتارلىق تۈرلۈك تەنھەرىكەت تۈرلىرىدە ئۇيغۇرلارنىڭ جەسۇرانە روھىنى، كۈچ-قۇدرىتىنى نامايان قىلماقتا.