ئامېرىكا خىتاينىڭ خوڭكوڭدىكى ئالتە ئەمەلدارىغا جازا يۈرگۈزدى

ئامېرىكا تاشقى ئىشلار مىنىستىرلىقى 31-مارت «خوڭكوڭ سىياسىتى قانۇنى دوكلاتى»نى ئېلان قىلىش بىلەن بىرگە، خىتاينىڭ خوڭكوڭدىكى ئورگانلىرىدىكى ۋە خوڭكوڭ ھۆكۈمىتىدىكى ئالتە ئەمەلدارغا جازا يۈرگۈزگەنلىكىنى ئېلان قىلدى.

ئامېرىكا ھۆكۈمىتى جازا يۈرگۈزۈلگەن خىتاي ۋە خوڭكوڭ ئەمەلدارلىرىنىڭ «دۆلەت بىخەتەرلىك قانۇنى» ئارقىلىق، دۆلەت سىرتىدا چېگرا ھالقىغان باستۇرۇش ئىجرا قىلغانلىقىنى ۋە خوڭكوڭنىڭ يۈكسەك ئاپتونومىيەسىنى ئاجىزلاشتۇرغانلىقىنى، بۇ خىتاينىڭ خەلقئاراغا بەرگەن ۋەدىلىرىگە خىلاپ ئىكەنلىكىنى بىلدۈرگەن.

يېڭى جازالانغانلار خوڭكوڭ قانۇن مەھكىمىسى باشلىقى، ساقچى ئىدارىسىنىڭ سابىق باشلىقى، خىتاينىڭ خوڭكوڭدىكى دۆلەت بىخەتەرلىك ئىدارىسىنىڭ باشلىقى قاتارلىقلارنى ئۆز ئىچىگە ئالىدىكەن. قارارغا ئاساسەن مەزكۇر ئەمەلدارلارنىڭ ئامېرىكىدىكى مال-مۈلكى توڭلىتىلىدىغان بولۇپ، باشقا ئامېرىكىلىقلارنىڭ ئۇلار بىلەن سودا مۇناسىۋىتىدە بولۇشى، مال-مۈلۈك بىلەن تەمىنلىشى چەكلىنىدىكەن.

خىتاي تاشقى ئىشلار مىنىستىرلىقىنىڭ خوڭكوڭدا تۇرۇشلۇق باياناتچىسى 1-ئاپرېل ئامېرىكىنىڭ بۇ قارارىغا نارازىلىق بىلدۈرۈپ، جازانىڭ يولسىز بولغانلىقى، دوكلاتنىڭ بولسا «بىر دۆلەتتە ئىككى خىل تۈزۈم»نى قارىلاش ئىكەنلىكى ھەققىدە جار سالغان ۋە خوڭكوڭلۇقلارنى باستۇرۇشتا ۋاسىتە سۈپىتىدە پايدىلىنىۋاتقان «دۆلەت بىخەتەرلىك قانۇنى»نى ئاقلىغان.

خوڭكوڭ ھۆكۈمىتىمۇ خىتايغا ماس ھالدا بايانات ئېلان قىلغان بولۇپ، خوڭكوڭ ۋە خىتاي تەرىپىدىن تۇتقۇن قىلىنغانلارنىڭ چەت ئەلدە دۆلەت بىخەتەرلىكىگە زىيان يەتكۈزىدىغان ئىشلارنى داۋاملاشتۇرغانلىقى، دۆلەتنى پارچىلاشقا قۇتراتقانلىقى ۋە باشقا دۆلەتلەرنى خىتاي ۋە خوڭكوڭنى جازالاشقا، قامال قىلىشقا ۋە باشقا دۈشمەنلىك ھەرىكەتلىرىنى قوللىنىشقا ئۈندىگەنلىكى، بۇ سەۋەبلىك ئۇلارغا قارشى تەدبىر قوللانغانلىقى، ئامېرىكا تەرەپنىڭ خوڭكوڭ ھۆكۈمىتىنىڭ تەدبىرلىرىنى قەستەن قارىلاپ، مەسئۇلىيەتسىز سۆزلەرنى تارقاتقانلىقى ھەققىدە جار سالغان.