ئۇيغۇرلار ھەققىدىكى قانۇن لايىھەسى يەنە بىر قېتىم پارلامېنتقا سۇنۇلدى

ئامېرىكىدىكى ئىككى پارتىيەنىڭ بىر تۈركۈم پارلامېنت ئەزالىرى «ئۇيغۇر ئىنسان ھەقلىرىنى قوغداش قانۇن لايىھەسى»نى قايتىدىن پارلامېنتقا سۇندى.

ئەركىن ئاسىيا رادىيوسىنىڭ بۇ ھەقتىكى خەۋىرىدە قەيت قىلىنىشىچە، ئامېرىكا ئاۋام پالاتاسىنىڭ ئىككى پارتىيەگە تەۋە 12 پالاتا ئەزاسى خىتايدىكى باستۇرۇشتىن قېچىپ چىققان ئۇيغۇرلار ۋە باشقا «ئاز سانلىق مىللەت»لەرنىڭ ئامېرىكىدا پاناھلىق تىلەش ئىشلىرىنى ئاسانلاشتۇرۇشنى، قوشۇمچە ياردەم تەمىنلەشنى مەقسەت قىلغان بىر قانۇن لايىھەسىنى سۇنغان.

دېموكراتچىلارنىڭ ئاۋام پالاتا ئەزاسى سۇھاس سۇبرامانيام (Suhas Subramanyam) مەزكۇر قانۇن لايىھەسىنى ئوتتۇرىغا قويغۇچىلارنىڭ بىرى بولۇپ، ئۇ خىتاي ئۇيغۇرلارغا قاراتقان ۋەھشىي زىيانكەشلىكنىڭ بىر ئىنسان ھەقلىرى كىرىزىسى ئىكەنلىكىنى، ئۆز ئىشتاتىدىكى ئۇيغۇرلاردىن ئۇلارنىڭ باستۇرۇشتىن قېچىپ كەلمەكچى بولغان تۇغقانلىرى ھەققىدىكى چوڭقۇر ئەندىشىلىرىنى ئۆز قۇلىقى بىلەن ئاڭلىغانلىقىنى، تەسەۋۋۇر قىلغۇسىز زۇلۇمنى باشتىن كەچۈرۈۋاتقان ئۇيغۇرلارنىڭ پاناھلىق خىزمەتلىرىنى تېزلىتىش تەلەپ قىلىنغان مەزكۇر تەشەببۇسقا باشلامچىلىق قىلغانلىقىدىن پەخىرلىنىدىغانلىقىنى بىلدۈرگەن.

جۇمھۇرىيەتچىلەرنىڭ ئاۋام پالاتاسى ئەزاسى مارىيا ئېلۋىرا سالازارمۇ (Maria Elvira Salazar) مەزكۇر قانۇن لايىھەسىنى سۇنغۇچىلارنىڭ بىرى بولۇپ، ئۇ ئۇيغۇر ئىرقىي قىرغىنچىلىقىنى «بىز ھازىرغىچە كۆرگەن ئىنسانىيەتكە قارشى ئەڭ قورقۇنچلۇق جىنايەتلەرنىڭ بىرى» دەپ سۈپەتلىگەن.

سالازار بۇ قانۇن لايىھەسى ھەققىدە توختىلىپ، ئامېرىكىنىڭ پاناھلىق سىستېمىسىنىڭ ئەڭ ئېھتىياجلىق بولغانلارنى قوغداش ئۈچۈن لايىھەلەنگەنلىكىنى، شۇنىڭ ئۈچۈن شەرقىي تۈركىستاندىكى ئۇيغۇرلار ۋە باشقا ئېزىلگەن مىللەتلەر ئۇچراۋاتقان سىستېمىلىق زىيانكەشلىك ۋە قىيىن-قىستاقتىن قېچىپ چىقالىغانلارنى ئالدىنقى ئورۇنغا قويۇش كېرەكلىكىنى تەكىتلىگەن.

خەۋەردە مەزكۇر قانۇن لايىھەسىنىڭ رەسمىي قانۇنغا ئايلىنىشى ئۈچۈن تۈرلۈك توسالغۇلاردىن ئۆتۈشى كېرەكلىكى، گەرچە ئىككى پارتىيەنىڭ قوللىشىغا ئېرىشكەن بولسىمۇ، رەسمىي ماقۇللىنىشىنىڭ تېخى نامەلۇم ئىكەنلىكى، چۈنكى تىرامپ ھۆكۈمىتىنىڭ نۆۋەتتە كۆچمەنلەرنى ئازايتىش ئۈچۈن ھەرىكەت قىلىۋاتقانلىقى قەيت قىلىنغان.