ئىستانبۇلدا روزا ھېيت مۇناسىۋىتى بىلەن ھېيتلىشىش پائالىيىتى ئۆتكۈزۈلدى

مۇبارەك روزا ھېيتنى تەبرىكلەش مۇناسىۋىتى بىلەن، 31-مارت ئىستانبۇلنىڭ سەفاكۆي رايونىدا ھېيتلىشىش پائالىيىتى ئۆتكۈزۈلدى.

خەلقئارا شەرقىي تۈركىستان تەشكىلاتلار بىرلىكى ئورۇنلاشتۇرغان مەزكۇر پائالىيەت قۇرئان تىلاۋىتى بىلەن باشلاندى. ئالدى بىلەن خەلقئارا شەرقىي تۈركىستان تەشكىلاتلار بىرلىكى رەئىسى پىروفېسسور، دوكتور ئاتاۋۇللاھ شاھيار سۆز قىلىپ، شەرقىي تۈركىستان مۇستەقىللىق مۇجادىلىسىدە خەلقنىڭ بىرلىكى، ئىتتىپاقلىقىنىڭ نەقەدەر زۆرۈرلۈكىنى تەكىتلەش بىلەن بىرگە، بۇ مۇبارەك ھېيتنىڭ قېرىنداشلىق رىشتىسىنى كۈچەيتىش پۇرسىتى ئەسكەرتىپ ئۆتتى.

ئارقىدىن شەرقىي تۈركىستان ئۆلىمالار بىرلىكى رەئىسى دوتسېنت، دوكتور ئالىمجان بۇغدا سۆز قىلىپ، ئاللاھقا ھەقىقىي تەرزدە بەندىچىلىك قىلىشنىڭ ئەھمىيىتى ھەققىدە توختالدى ۋە بۇ قېتىملىق ھېيتلىشىش پائالىيىتىگە ئوخشاش ئەھمىيەتلىك يىغىلىشلارغا پەرزەنتلەرنى قاتناشتۇرۇشنىڭ ئەھمىيىتىنى تەكىتلىدى.

پائالىيەتتە يەنە بىر قىسىم ياشلار شېئىر دېكلاماتسىيە قىلغاندىن سىرت، ئۇيغۇرلارنىڭ تارىخى، ئىسلام دىنى، شەرقىي تۈركىستاننىڭ جۇغراپىيەلىك ئالاھىدىلىكى قاتارلىق بىلىملەر ھەققىدە زېھىن سىناش ئويۇنى ئۆتكۈزۈلدى ۋە توغرا جاۋاب بەرگەن ئۆسمۈرلەر مۇكاپاتلاندى.

ئاخىردا شەرقىي تۈركىستان ئۆلىمالار بىرلىكى مۇئاۋىن رەئىسى مۇھەممەد ئۆمەر قارىھاجىمنىڭ باشچىلىقىدا ئوپچە دۇئا قىلىنغاندىن كېيىن، پائالىيەتكە قاتناشقان بارلىق ئۆسمۈرلەرگە ھېيتلىق پۇل تارقىتىلدى.

دۇنيانىڭ ھەرقايسى جايلىرىدىكى ئۇيغۇرلارمۇ روزا ھېيتنى تۈرلۈك ئۇسۇللار، پائالىيەتلەربىلەن تەبرىكلىدى. شۇنىڭ بىلەن بىرگە خىتاينىڭ شەرقىي تۈركىستاندا تۈرلۈك ئىبادەتلەرنى چەكلىگەندىن سىرت، خەلقنى ھېيت خۇشاللىقىدىنمۇ مەھرۇم قىلغانلىقى ھەققىدىكى ئەسكەرتىش، چاقىرىقلارمۇ ئىجتىمائىي تاراتقۇلاردىن ئورۇن ئالدى.