خىتاي ئوقۇغۇچىلار ئامېرىكىنىڭ يېڭى قانۇن لايىھەسىگە نارازىلىق بىلدۈردى

بىر قىسىم خىتاي ئوقۇغۇچىلار ئۆتكەن ھەپتە جۇمھۇرىيەتچى پارلامېنت ئەزالىرى تەرىپىدىن ئوتتۇرىغا قويۇلغان خىتاي ئوقۇغۇچىلىرىنىڭ ئامېرىكا مەكتەپلىرىگە كىرىشنى توسۇشنى مەقسەت قىلغان قانۇن لايىھەسىگە نارازىلىق بىلدۈردى.

«خىتاي كومپارتىيەسى ئەزالىرىغا ۋىزا بېرىشنى توختىتىش قانۇنى» دەپ ئاتالغان بۇ قانۇن لايىھەسى ئامېرىكا ئۇنىۋېرسىتېتلىرىدا ئوقۇش ياكى ئالاقە پىروگراممىلىرىغا قاتنىشىشنى ئارزۇ قىلغان خىتايلارغا ئوقۇغۇچى ۋىزىسى بېرىشنى توختىتىدىكەن.

بۇ قانۇن لايىھەسىدە دۆلەت بىخەتەرلىكى مەسىلىسى تىلغا ئېلىنغان بولۇپ، ئوقۇغۇچى ۋىزىسى بىلەن كەلگەنلەر ئىلگىرى خىتاي كوممۇنىستىك پارتىيەسى ئۈچۈن جاسۇسلۇق قىلىشقا ئۇرۇندى، دېيىلگەن. بىراق خىتايلار ئۆزلىرىنىڭ ئامېرىكىغا تېخىمۇ كۆپ ئاكادېمىك ئەركىنلىك ئىزدەپ كەلگەنلىكىنى دەۋا قىلغان ۋە بۇ قانۇننى يېڭى «خىتاينى چەكلەش قانۇنى» دەپ ئاتىغان.

خىتاينىڭ ئامېرىكىدىكى ئەلچىخانىسى ئامېرىكا ھۆكۈمىتىنىڭ ئۇزۇن مۇددەتتىن بېرى ئامېرىكىدا قانۇنلۇق ۋىزا بىلەن تۇرۇۋاتقان خىتاي ئوقۇغۇچىلىرىنى باستۇرۇپ كەلگەنلىكى ۋە خىتاي بۇنىڭغا قەتئىي قارشى تۇرىدىغانلىقى ھەققىدە جار سالغان.

بىلدۈرۈلۈشىچە، جۇمھۇرىيەتچىلەرنىڭ بەش ئاۋام پالاتاسى ئەزاسى بۇ قانۇن لايىھەسىنى بىرلىكتە ئوتتۇرىغا قويغان بولۇپ، كېڭەش پالاتا ئەزاسى ئەشلى مۇدى كېڭەش پالاتاسىغا ماس كېلىدىغان ئالاقىدار قانۇن لايىھەسىنى ئوتتۇرىغا قويۇشنى پىلانلىغان.

بىلدۈرۈلۈشىچە، مىچىگان ئۇنىۋېرسىتېتىنىڭ بەش خىتاي ئوقۇغۇچىسى 2023-يىلى كېچىدە ھەربىي بازىنى زىيارەت قىلغاندا تۇتۇلۇپ سوراققا تارتىلغان. بۇ جەرياندا دۆلەت بىخەتەرلىك مەسىلىسىدە بىرەر غەيرىي ئەھۋال بايقالمىغان بولسىمۇ، ئۇلار تەكشۈرگۈچىلەرگە يالغان ئېيتىش ۋە تېلېفونلىرىدىكى سۈرەتلەرنى ئۆچۈرۈشتە تىل بىرىكتۈرۈش بىلەن ئەيىبلەنگەن.

تەييارلىغۇچى: ئابدۇخەبەر رەجەپ