كانادا خىتاينىڭ تۆت كانادالىققا ئۆلۈم جازاسى بەرگەنلىكىنى ئەيىبلىدى

كانادا ھۆكۈمىتى تۆت كانادالىققا زەھەرلىك چېكىملىك جىنايىتى بىلەن ئۆلۈم جازاسى بېرىلگەنلىكى ھەققىدە خىتاينى ئەيىبلىدى.

نىيۇيورك ۋاقىت گېزىتىنىڭ 20-مارت خەۋەر قىلىشىچە، كانادا تاشقى ئىشلار مىنىستىرى مېلانى جولى خىتاينىڭ زەھەرلىك چېكىملىككە چېتىلغان تۆت كانادالىققا ئۆلۈم جازاسى بەرگەنلىكىنى ئەيىبلەيدىغانلىقىنى، بۇ خىتاي بىلەن كانادا ئوتتۇرىسىدىكى كەسكىن مۇناسىۋەتنى تېخىمۇ كۈچەيتىدىغانلىقىنى، ھۆكۈمەتنىڭ ئوخشاش ئەھۋالدىكى باشقا كانادالىقلارغا كەڭچىلىك قىلىش ئۈچۈن ھەرىكەت قىلىدىغانلىقىنى ئېيتقان.

خىتاينىڭ ئوتتاۋادىكى ئەلچىخانىسى خىتاينىڭ ئۆلۈم جازاسى قارارىنى ئاقلىغان، ئەمما ئۆلۈم جازاسى توغرىسىدا تەپسىلىي مەلۇمات بەرمىگەن. خەۋەرلەرگە ئاساسلانغاندا، بۇ ئۆلۈم جازالىرى بۇ يىلنىڭ بېشىدا ئىجرا قىلىنغان.

مېلانى جولىنىڭ ئېيتىشىچە، ئۆزى ۋە سابىق باش مىنىستىر جاستىن تىرۇدو خىتاينى كانادالىقلارغا كەڭچىلىك قىلىشقا چاقىرغان ھەمدە بۇ كىشىلەرنىڭ قوش گىراژدانلىق سالاھىيەتكە ئىگە ئىكەنلىكىنى تەكىتلىگەن. ئەمما خىتاي قوش گىراژدانلىق سالاھىيەتنى ئېتىراپ قىلمىغان.

تەييارلىغۇچى: ئابدۇخەبەر رەجەپ