تاراتقۇلار: ئەركىن ئاسىيا رادىيوسى قاتارلىقلارنىڭ ئاجىزلىشىشى خىتايغا پۇرسەت بولىدۇ

خەلقئارالىق تاراتقۇلار ئامېرىكا ئاۋازى ۋە ئەركىن ئاسىيا رادىيوسىنىڭ ئاجىزلىشىشىنىڭ خىتاينىڭ ئاخبارات ساھەدىكى كۆرەڭلىكىنى تېخىمۇ كۈچەيتىدىغانلىقىنى ئىلگىرى سۈرمەكتە.

كانادا يەرشارى ۋە پوچتا گېزىتىنىڭ 19-مارتتىكى خەۋىرىدە بىلدۈرۈلۈشىچە، تىرامپ ھۆكۈمىتىنىڭ ئامېرىكا ئاۋازى ۋە ئەركىن ئاسىيا رادىيوسىنىڭ مەبلىغىنى قىسقارتىشى ئامېرىكىنىڭ خەلقئارالىق ئاخباراتتىكى تەسىرىنى چەكلەپ، خىتاي قاتارلىق مۇستەبىت ھاكىمىيەتلەرنىڭ كۈچىيىشىگە ياردەم بېرىشى مۇمكىن ئىكەن. گەرچە بىر قىسىم كىشىلەر ئامېرىكا ئاۋازىنىڭ ئەمدى مۇھىم ئەمەسلىكىنى ئىلگىرى سۈرسىمۇ، لېكىن ئۇ ھەر ھەپتىدە يەنىلا 420 مىليون ئادەمگە زۇلۇم ئاستىدىكى رايونلار ھەققىدىكى مۇھىم خەۋەرلەرنى تارقىتىدىكەن.

ئامېرىكا ئاخبارات ۋاسىتىلىرى خام چوتنى قىسقارتىشقا دۇچ كېلىۋاتقان بىر پەيتتە، خىتاينىڭ دۆلەت ئىگىلىكىدىكى ئاخبارات ۋاسىتىلىرى ئۆزىنىڭ تەسىر كۈچىنى كېڭەيتىشكە تەييارلىق قىلغان. بولۇپمۇ مۇستەقىل ئاخبارات كەمچىل بولغان تەرەققىي قىلىۋاتقان دۆلەتلەردە خىتاي رېجىمى تەشۋىقاتلىرىنى تېخىمۇ كۈچەيتىشنى پىلانلىغان.

مەزكۇر خەۋەردە يەنە شى جىنپىڭ ھاكىمىيەت بېشىغا چىققاندىن كېيىن خىتاينىڭ دۇنيا مىقياسىدىكى تەشۋىقات ھەرىكەتلىرىنى كۈچەيتىش ئۈچۈن، مەخسۇس ساختا تەشۋىقات مېخانىزمى قۇرۇپ چىققانلىقى، بۇ ئامېرىكا ئاۋازى قاتارلىق ئامېرىكىنىڭ مۇستەقىل ئاڭلىتىش ئورگانلىرى بىلەن ئوخشىمايدىغانلىقى تەكىتلەنگەن.

تەييارلىغۇچى: ئابدۇخەبەر رەجەپ