فىلىپپىن خىتايغا تايىنىپ قېلىشتىن قۇتۇلۇشقا تىرىشماقتا

فىلىپپىن ھىندىستانغا نىكېل مەھسۇلاتلىرىنى تەشۋىق قىلىۋاتقان بولۇپ، خىتايغا بولغان تايىنىشتىن قۇتۇلۇشقا تىرىشقان.

جەنۇبىي خىتاي سەھەر پوچتىسىنىڭ 19-مارت خەۋەر قىلىشىچە، فىلىپپىن ھىندىستاننى نىكېل ئىشلەپچىقىرىشى ساھەسىدىكى يېڭى سودا شېرىكى قىلىشنى ئۈمىد قىلىۋاتقان بولۇپ، بۇنىڭدىكى مەقسىتى خىتايغا بولغان تايىنىشنى ئازايتىش ۋە ھىندىستاننىڭ ئىشلەپچىقىرىش ساھەسىدىكى تەرەققىياتىنى قوللاش ئىكەن.

فىلىپپىن تاشقى ئىشلار مىنىستىرى ئېنرىكې مانالو فىلىپپىننىڭ نىكېل سانائىتىگە ھىندىستاننىڭ ئىشتىراك قىلىشىنىڭ مۇھىملىقىنى، ئېكسپورت تۈرلىرىنى كۆپەيتىشنىڭ ئەھمىيىتىنى تەكىتلىگەن.

بىلدۈرۈلۈشىچە، نۆۋەتتە فىلىپپىننىڭ نىكېل رۇدىلىرىنىڭ ھەممىسى دېگۈدەك خىتايغا ئېكسپورت قىلىنماقتىكەن. فىلىپپىن بىلەن ھىندىستان ئارىسىدىكى مۇناسىۋەتنى كۈچەيتىش ئىقتىسادىي بىخەتەرلىكنى ئاشۇرىدىكەن. شۇنداقلا رايوندىكى ئۆزگىرىۋاتقان ۋەزىيەتكە تاقابىل تۇرۇش جەريانىدا دۆلەت مۇداپىئەسى ۋە تېخنىكا قاتارلىق كۆپلىگەن ساھەلەردە ھەمكارلىقنى ئىلگىرى سۈرەلەيدىكەن.

تەھلىلچىلەرنىڭ كۆرسىتىشىچە، سودا مۇناسىۋەتلىرىنى كېڭەيتىش ھىندىستاننىڭ شەرققە يۈزلىنىش سىياسىتى ۋە فىلىپپىننىڭ ئىشەنچلىك شېرىك تېپىش ئېھتىياجىغا ماس كېلىدىكەن.

تەييارلىغۇچى: ئابدۇخەبەر رەجەپ