خىتاي مىللەتچىلىرى RFA قاتارلىق ئورگانلارنىڭ ياردىمى توختىتىلغانلىقىدىن خۇشاللىققا چۆمگەن

خىتاي مىللەتچىلىرى تىرامپ ھۆكۈمىتىنىڭ ئەركىن ئاسىيا رادىيوسى، ئامېرىكا ئاۋازى قاتارلىق تاراتقۇ ئورگانلىرىنىڭ ئىقتىسادىي مەنبەسىنى ئۈزگەنلىكى ھەققىدىكى خەۋەردىن قاتتىق خۇشال بولغان.

نىيۇيورك ۋاقىت گېزىتىنىڭ 18-مارت خەۋەر قىلىشىچە، خىتاي ئاخبارات ۋاسىتىلىرى ئامېرىكا ئاۋازى، ئەركىن ئاسىيا رادىيوسى قاتارلىق ئورگانلارنىڭ خامچوتىنىڭ زور دەرىجىدە قىسقارتىلغانلىقىنى تەبرىكلىگەن. ئامېرىكا ھۆكۈمىتى ئىقتىسادىي جەھەتتىن ياردەم قىلىپ كېلىۋاتقان بۇ ئىككى تاراتقۇ ئورگىنى ئۇزۇن ۋاقىتتىن بېرى كۆپلىگەن تىللاردا خىتايدىكى ئىنسان ھەقلىرى دەپسەندىچىلىكى ۋە شەرقىي تۈركىستاندىكى ئىرقىي قىرغىنچىلىققا ئالاقىدار خەۋەرلەرنى ئېلان قىلىپ كەلگەن بولۇپ، خىتاي ئۇلارنى «ئامېرىكىنىڭ تەشۋىقات قورالى» دەپ ئەيىبلەپ كەلگەن.

پىرېزىدېنت تىرامپ بۇ ئورگانلارنى نازارەت قىلىدىغان ئامېرىكا يەرشارى مېدىيا ئاگېنتلىقىنى تارقىتىۋېتىدىغان ھۆكۈمەت بۇيرۇقىغا ئىمزا قويغاندىن كېيىن، ئامېرىكا ئاۋازى خىزمەتچىلىرى ھەق تۆلىنىدىغان دەم ئېلىشقا قويۇپ بېرىلگەن. ئۇندىن باشقا ئەركىن ئاسىيا رادىيوسىنىڭ ئىقتىسادىي مەنبەسىمۇ توختىتىلغان. بۇ ئەھۋال ئاخبارات خادىملىرىنىڭ كېلەچىكى ۋە ئىمكانىيىتى توغرىسىدا ئەندىشىگە سەۋەب بولغان.

تەييارلىغۇچى: ئابدۇخەبەر رەجەپ