ب د ت ئىنسان ھەقلىرى كېڭىشىدە خىتاينىڭ جىنايەتلىرى تونۇشتۇرۇلدى

جەنۋەدە ئېچىلغان ب د ت ئىنسان ھەقلىرى كېڭىشىدە خىتاينىڭ شەرقىي تۈركىستاندا ئىجرا قىلىۋاتقان ئىرقىي قىرغىنچىلىق جىنايەتلىرى، خۇسۇسەن دىنىي باستۇرۇشلىرى تەپسىلىي تونۇشتۇرۇلدى.

شىۋېتسارىيەنىڭ جەنۋە شەھىرىدە 17-مارت ئېچىلغان بىرلەشكەن دۆلەتلەر تەشكىلاتى 58-نۆۋەتلىك ئىنسان ھەقلىرى كېڭىشىگە دۇنيا ئۇيغۇر قۇرۇلتىيىدىن بىر ھەيئەت قاتناشقان بولۇپ، خىتاينىڭ شەرقىي تۈركىستاندا ئىجرا قىلىۋاتقان ئىرقىي قىرغىنچىلىق جىنايىتىنى تونۇشتۇرغان.

يىغىنىدا دۇنيا ئۇيغۇر قۇرۇلتىيىنىڭ رەئىسى تۇرغۇنجان ئالاۋۇدۇن ئۇيغۇرلارنىڭ ۋەكىلى سۈپىتىدە سۆز قىلغان. ئۇنىڭ شەرقىي تۈركىستاندىكى خىتاينىڭ جىنايى قىلمىشىلىرىنى ئەرەب تىلىدا تونۇشتۇرۇشى يىغىن ئىشتىراكچىلىرىنىڭ دىققىتىنى قوزغىغان. مەلۇم بولۇشىچە، كېڭەشتە كۆپ سانلىقنى تەشكىل قىلغان ئەرەب ئەللىرىنىڭ ۋەكىللىرى ئۇيغۇر مۇسۇلمانلىرىنىڭ رامىزاندا روزا تۇتالماسلىقى، مەسچىتلەرگە بارالماسلىقى، قۇرئان ئوقۇش ۋە باشقا دىنىي پائالىيەتلەرنىڭ چەكلىنىشى قاتارلىق خىتاينىڭ جىنايەتلىرىنى تۇنجى قېتىم بىۋاسىتە ئاڭلاپ ھەيران قالغان.

دۇنيا ئۇيغۇر قۇرۇلتىيى ۋەكىللىرى يەنە يىغىن جەريانىدا ب د ت دا بىر قاتار پائالىيەتلەرنى ئورۇنلاشتۇرۇپ، خىتاينىڭ شەرقىي تۈركىستاندا ئۇيغۇرلارغا قارشى ئىجرا قىلىۋاتقان ئىرقىي قىرغىنچىلىق جىنايەتلىرىنى تونۇشتۇرغان. ب د ت ئىشخانىسى ئالدىدا يەنە «ئۇيغۇر ئىرقىي قىرغىنچىلىقى» تېمىسىدا ئۈچ كۈنلۈك سۈرەت كۆرگەزمىسى ئۆتكۈزۈلگەن.

تەييارلىغۇچى: ئابدۇخەبەر رەجەپ