ھىندىستاننىڭ سىياسىي قىيىنچىلىققا دۇچ كېلىشى بىلەن پاكىستان ھەرىكەت باشلىدى

ھىندىستان سىياسىي جەھەتتىن بىر قىسىم قىيىنچىلىققا دۇچ كەلگەن بىر پەيتتە، پاكىستان بىلەن بېنگالنىڭ مۇناسىۋىتى كۈنسايىن يېقىنلاشقان.

نىككېي ئاسىيا قانىلىنىڭ 18-مارت خەۋەر قىلىشىچە، يېقىنقى دىپلوماتىك ھەرىكەتلەر خەلقئارا مۇناسىۋەتلەرنى قايتا شەكىللەندۈرۈش ئېھتىماللىقىنى كۆرسەتكەن بولۇپ، ئامېرىكا پىرېزىدېنتى دونالد تىرامپنىڭ ئۇكرائىنا بىلەن بولغان تالاش-تارتىشلىق مۇناسىۋىتى ياۋروپا ئىتتىپاقى دۆلەتلىرىنى مۇداپىئە تەدبىرلىرىنى كۈچلەندۈرۈشكە ئۈندىگەن. كىچىك دائىرىدە بولسا، پاكىستان بىلەن بېنگال ئوتتۇرىسىدىكى دىيالوگ جەنۇبىي ئاسىيادىكى زور ئۆزگىرىشنى نامايان قىلغان. بۇ رايون ئەنئەنىۋى جەھەتتىن دۈشمەنلىك مۇناسىۋەتلەر بىلەن گەۋدىلىنىپ كەلگەن.

بىلدۈرۈلۈشىچە، بېنگالنىڭ مۇۋەققەت رەھبىرى مۇھەممەد يۇنۇس بىلەن پاكىستان باش مىنىستىرى شاھباز شەرىف بىرلەشكەن دۆلەتلەر تەشكىلاتى يىغىنىدا كۆرۈشكەندىن كېيىن، ئىككى دۆلەت بىرلىكتە ھەرىكەت قىلىشقا باشلىغان. بۇنىڭ ئىچىدە تىرانسپورت ئاۋىياتسىيەسىنى يولغا قويۇش ۋە يەتتە يىللىق ھاۋا قاتنىشى ئۈزۈلۈشتىن كېيىن بىۋاسىتە ئايروپىلان قاتناش لىنىيەسىنى ئەسلىگە كەلتۈرۈش قاتارلىقلار بار ئىكەن.

بېنگال بىلەن پاكىستان ئوتتۇرىسىدىكى سودا قىممىتى 2022-يىلى بىر مىليارد ئامېرىكا دوللىرىغا يەتكەن بولۇپ، بۇلار ئاساسەن پاختا ۋە كەندىر ئېكسپورتى ئىكەن. مۇھەممەد يۇنۇس ھەمكارلىق پۇرسەتلىرىنى، بولۇپمۇ شېكەر ئىشلەپچىقىرىش جەھەتتىكى ھەمكارلىقنى تەكىتلىگەن بولۇپ، بېنگال دۆلەتتىكى شېكەر زاۋۇتلىرىنى زامانىۋىلاشتۇرۇشنى ئۈمىد قىلىدىكەن. بۇنىڭدىن باشقا، ھەربىي ھەمكارلىق ۋە مەدەنىيەت ئالماشتۇرۇش قاتارلىقلارمۇ تەكىتلەنگەن.

ئىككى دۆلەت ئوتتۇرىسىدا 1971-يىلىدىكى مۇستەقىللىق ئۇرۇشىدىن قالغان تارىخىي ئۆچمەنلىكلەر بار بولسىمۇ، مۇناسىۋەتنى ئىلگىرى سۈرۈشكە بولغان ئىستەكلىرىنى نامايان قىلغان. بۇ بېنگالنىڭ ئۇزۇن مۇددەتتىن بېرى ھىندىستان بىلەن بولغان مۇناسىۋىتىگە تەسىر كۆرسەتكەن.

تەييارلىغۇچى: ئابدۇخەبەر رەجەپ