ياۋروپا ئىتتىپاقى سۇرىيەگە نەچچە مىليارد دوللارلىق ياردەم بېرىشكە ۋەدە قىلغان

ياۋروپا ئىتتىپاقى سۇرىيەگە نەچچە مىليارد دوللارلىق ياردەم بېرىدىغانلىقىنى ۋەدە قىلغان، بىراق سۇرىيەگە قارىتىلغان جازا تەدبىرلىرى بۇنىڭغا توسالغۇ بولماقتىكەن.

گېرمانىيە ئاۋازىنىڭ 18-مارت خەۋەر قىلىشىچە، يېقىندا بىريۇسسېلدا ئۆتكۈزۈلگەن ياۋروپا ئىتتىپاقى باشچىلىقىدىكى يىغىندا، ئىئانە قىلغۇچىلار سۇرىيە ۋە قوشنا دۆلەتلەرنى قوللاش ئۈچۈن تەخمىنەن 5.8 مىليارد ياۋرو (6.3 مىليارد ئامېرىكا دوللىرى) ۋەدە قىلغان. بۇ ئۆتكەن يىلى ۋەدە قىلىنغان 7.5 مىليارد ياۋرودىن ئازراق ئىكەن.

سۇرىيە ۋاقىتلىق ھۆكۈمىتىنىڭ تاشقى ئىشلار مىنىستىرى ئەسەد ئەلھىبانى سۇرىيەنىڭ مۇقىملىقى ھەققىدىكى ئەندىشىلەرگە قارىماي، ياۋروپا ئىتتىپاقىنىڭ يېڭى ھۆكۈمەت بىلەن مۇناسىۋەت قۇرۇشىنى خالايدىغانلىقىنى تەكىتلىگەن. ياۋروپا ئىتتىپاقى ئۈمىدۋارلىقنى ئىلگىرى سۈرۈش ۋە قالايمىقانچىلىقنىڭ ئالدىنى ئېلىش ئۈچۈن، جازا تەدبىرلىرىنى يەڭگىللەتمەكچى بولغان. ئەمما ئامېرىكىنىڭ بۇ ھەرىكەتكە ئىشتىراك قىلىشى ۋە قوللىشى يەنىلا نامەلۇم بولۇپ، ئامېرىكا سۇرىيەگە بېرىلىدىغان ياردەمنى ئاشۇرۇشنى خالىمايدىغانلىقىنى بىلدۈرگەن.

ياۋروپا ئىتتىپاقى ئەمەلدارلىرى ئېنېرگىيە ۋە ئۇل ئەسلىھە ساھەسىدىكى مەبلەغلەرگە يول قويۇش ئۈچۈن، بەزى چەكلىمىلەرنى بىكار قىلىشقا باشلىغان. ئەمما ئامېرىكىنىڭ كەڭ كۆلەملىك جازا تەدبىرلىرى سۇرىيەدىكى پۇل مۇئامىلە ساھەسىنى مۇرەككەپلەشتۈرۈۋەتكەن. ئىنسانپەرۋەرلىك تەشكىلاتلىرى ھۆكۈمەت مەنبەلىرى چەكلىك بولغانلىقتىن، شەخسىي مەبلەغ سالغۇچىلارنىڭ ئارىلىشىشىنىڭ زۆرۈرلۈكىنى تەكىتلىگەن.

ياۋروپا ئىتتىپاقى سۇرىيەنىڭ قايتا قۇرۇلۇش خىزمەتلىرىنى ئىلگىرى سۈرۈشنى نىشانلىغان بولسىمۇ، بۇ تەشەببۇسلارنىڭ مۇۋەپپەقىيىتى يېڭى سۇرىيە رەھبەرلىكىنىڭ ھەرىكەتلىرىگە ۋە شەخسىي مەبلەغ سالغۇچىلارنى جەلپ قىلىش ئۈچۈن جازا تەدبىرلىرىنىڭ بىكار قىلىنىشىغا باغلىق ئىكەن.

تەييارلىغۇچى: ئابدۇخەبەر رەجەپ