تىرامپ «ئەركىن ئاسىيا رادىيوسى» قاتارلىق ئورگانلارغا بېرىلىدىغان ياردەمنى توڭلاتتى

تىرامپ ھۆكۈمىتى 15-مارت «ئەركىن ئاسىيا رادىيوسى»، «ئامېرىكا ئاۋازى»، «ئەركىن ياۋروپا رادىيوسى» قاتارلىق بىر تۈركۈم تاراتقۇ ئورگانلىرىغا بېرىلىدىغان ياردەملەرنى ۋاقىتلىق توختىتىش بۇيرۇقى چۈشۈرگەن.

BBC نىڭ بۇ ھەقتىكى خەۋىرىدە بىلدۈرۈلۈشىچە، ئامېرىكا ئاۋازى، ئەركىن ئاسىيا رادىيوسى، ئەركىن ياۋروپا رادىيوسى قاتارلىق ئاخبارات ئورگانلىرىنىڭ يۈزلىگەن خىزمەتچىلىرى ئالدىنقى ھەپتىنىڭ ئاخىرىدا شىركەتتىن كەلگەن ئېلخەتنى تاپشۇرۇۋالغان بولۇپ، ئۇلارنىڭ ئىدارىگە كىرىشى چەكلەنگەنلىكى، مۇخبىرلىق كىنىشكىسىنى ۋە ئىدارە تەقسىملىگەن ئۈسكۈنىلەرنى تاپشۇرۇشى كېرەكلىكى ئۇقتۇرۇلغان.

BBC خىتايچە بۆلۈمىنىڭ ئىگىلىشىچە، ئەركىن ئاسىيا رادىيوسىنىڭ ئىستانسا باشلىقى فاڭ بېي بۇ ھەقتە: «شەنبە كۈنى كەچتە ئاقساراي ئامېرىكا يەرشارى مېدىيا ئاگېنتلىقى (USAGM) قاتارلىق نۇرغۇن ئورگانلارغا تەسىر كۆرسىتىدىغان مەمۇرىي بۇيرۇق چۈشۈردى. بىز بۇ مەمۇرىي بۇيرۇقنىڭ ئەركىن ئاسىيا رادىيوسىغا قانداق تەسىر كۆرسىتىدىغانلىقىنى بىرلىكتە بىرتەرەپ قىلىۋاتقانلىقىمىزغا دىققەت قىلىڭلار. بۈگۈن ئەتىگەندە ئەركىن ئاسىيا رادىيوسى ۋە باشقا قېرىنداش مېدىيالار بىزگە كېلىدىغان ياردەمنىڭ توختىتىلغانلىقى ھەققىدە يەرشارى مېدىيا ئاگېنتلىقىدىن ئۇچۇر ئالدى. ئەركىن ئاسىيا رادىيوسى مەسئۇللىرى كىشىنى قايغۇغا سالىدىغان بۇ باسقۇچنىڭ زادى نېمىنى بىلدۈرىدىغانلىقىنى ۋە ئورگىنىمىزغا بولغان يوشۇرۇن تەسىرىنى بىلىش ئۈچۈن باھالىماقتا» دېگەن.

تىرامپ ئىلگىرى بىر قانچە ياردەم ئورگانلىرى ۋە مائارىپ بۆلۈملىرىنى پۈتۈنلەي ئەمەلدىن قالدۇرغان. ئۇ ئالدىنقى جۈمە يەنە مەمۇرىي بۇيرۇق چۈشۈرۈپ، ئامېرىكا يەرشارى مېدىيا ئاگېنتلىقىنى «پىرېزىدېنت ھاجەتسىز دەپ قارىغان فېدېراتىپ بىيۇروكراتىيە ئاپپاراتى» قاتارىغا كىرگۈزگەن.

تىرامپنىڭ قوللىغۇچىلىرىدىن بىرى بولغان كارى لېيك بۇندىن ئىلگىرى مەزكۇر مېدىيا ئورگىنىغا مەسئۇل قىلىپ تەيىنلەنگەن بولۇپ، ئۇ ئۆزى باشقۇرۇۋاتقان مېدىيا ئورگىنىغا يوللىغان ئېلخەتتە: «فېدېراتىپ مەبلەغ ئەمدى ئورگاننىڭ مۇھىم ئىشلىرى ئۈچۈن ئىشلىتىلمەيدۇ» دەپ يازغان.

خەۋەردە بىلدۈرۈلۈشىچە، ھازىرچە يۇقىرىدا تىلغا ئېلىنغان بىر قانچە رادىيو ئىستانسىلىرىنىڭ قاچان، قانداق تەرىقىدە ئىش توختىتىدىغانلىقى ئېنىق ئەمەس ئىكەن.

بۇ ئاينىڭ باشلىرىدا ئېلون ماسك يېتەكچىلىكىدىكى ھۆكۈمەت ئۈنۈمى مىنىستىرلىقى ئەركىن ئاسىيا رادىيوسى قاتارلىق تاراتقۇ ئورگانلىرىغا 30 كۈنلۈك مەبلەغ توڭلىتىش بۇيرۇقى ئىجرا قىلىدىغانلىقىنى جاكارلىغان. ئەركىن ئاسىيا رادىيوسى ئىلگىرى ئامېرىكا يەرشارى مېدىيا ئاگېنتلىقىغا ئۆز ئورگىنىنىڭ مالىيە قىيىنچىلىقىنى بىلدۈرگەن بولسىمۇ، تېخىچە جاۋاب ئالالمىغان، ھۆكۈمەت ئۈنۈمى مىنىستىرلىقىمۇ جاۋاب قايتۇرمىغان.

خىتاينىڭ ئىرقىي قىرغىنچىلىق جىنايىتىنى پاش قىلىشتا مۇھىم رول ئويناپ كېلىۋاتقان ئەركىن ئاسىيا رادىيوسى ۋە باشقا ئاخبارات ئورگانلىرىغا زەربە بەرگەن بۇ قارار ئامېرىكا سىياسەتچىلىرى، شۇنداقلا مۇھاجىرەتتە ئۇيغۇرلار ئارىسىدا چوڭ غۇلغۇلا قوزغىغان بولۇپ، نۇرغۇن دېموكراتچىلار يازما ئېلان قىلىپ، مېدىيانىڭ ئىززەت-ھۆرمىتىنى قوغداشقا چاقىردى. ئاۋام پالاتاسى خىتاي ئىشلىرى ئالاھىدە كومىتېتىنىڭ نوپۇزلۇق ئەزاسى راجا كرىشنامۇرتى ئەركىن ئاسىيا رادىيوسىنى تاقاشنىڭ ئامېرىكىنىڭ چەت ئەلدىكى يۇمشاق كۈچىگە زىيان كەلتۈرىدىغانلىقى توغرىسىدا ئاگاھلاندۇردى.

تەييارلىغۇچى: ئابدۇخەبەر رەجەپ