خىتاي شىركىتى پانامادىكى پورتنى سېتىشنى پىلانلىدى

خوڭكوڭنىڭ چاڭجياڭ خېجى گۇرۇھى پانامادىكى پورتنى سېتىشنى پىلانلىغان بولۇپ، بۇ سەۋەبلىك خىتاي رېجىمىنىڭ قاتتىق تەنقىدىگە ئۇچرىغان.

نىيۇيورك ۋاقىت گېزىتىنىڭ 17-مارت خەۋەر قىلىشىچە، خوڭكوڭدىكى چاڭجياڭ خېجى گۇرۇھى پاناما قاتارلىق جايلاردىكى پورتلارنى ئامېرىكا كاپىتال باشقۇرۇش شىركىتى باشچىلىقىدىكى بىر مەبلەغ سېلىش گۇرۇھىغا سېتىشنى پىلانلىغان بولۇپ، خىتاي رېجىمى بۇ كېلىشىمنى قاتتىق تەنقىد قىلغان ۋە بۇنىڭ خىتاينىڭ مۇھىم دېڭىز يوللىرىغا بولغان تەسىرىدىن ئايرىلىپ قېلىشىغا سەۋەب بولىدىغانلىقى توغرىسىدا ئاگاھلاندۇرغان.

بۇ تەنقىد خىتاينىڭ پاناما ۋە باشقا خەلقئارالىق پورتلارنى كونترول قىلىش سىياسىتىدىكى ئۆزگىرىشنى كۆرسىتىپ بېرىدىكەن. پىرېزىدېنت تىرامپ ۋەزىپىگە ئولتۇرغاندىن كېيىن، ئۇزاق ئۆتمەي خىتاينىڭ پاناما قانىلىدا ھەددىدىن زىيادە ھوقۇققا ئىگە ئىكەنلىكىدىن ئەنسىرەيدىغانلىقىنى بىلدۈرگەن. ئەينى ۋاقىتتا خىتاي ئۇنىڭ بۇ سۆزلىرىنى مەسخىرە قىلغان.

ئەمما خىتاينىڭ زۇۋانى دەپ قارالغان خوڭكوڭدىكى داگۇڭباۋ گېزىتى بۇ پورت سېتىۋېلىش پىلانىنى ئەيىبلىگەن. بۇ گېزىت پەيشەنبە كۈنى ئېلان قىلغان بىر ئوبزور ماقالىسىدە خوڭكوڭ شىركىتى چاڭجياڭ خېجى گۇرۇھىنىڭ پىلانىنى تەنقىد قىلغان. چاڭجياڭ خېجى شىركىتى پاناما قانىلىنىڭ ئىككى تەرىپىدىكى پورتلارنى ۋە دۇنيانىڭ باشقا جايلىرىدىكى 40 تىن ئارتۇق پورتنى ئامېرىكىنىڭ چوڭ شىركىتى بىلاك روك باشچىلىقىدىكى مەبلەغ سېلىش گۇرۇھىغا 19 مىليارد ئامېرىكا دوللىرىغا سېتىشنى پىلانلىغان.

داگۇڭباۋ گېزىتى خوڭكوڭدا خىتاينىڭ ئاۋازى دەپ قارىلىدىغان بولۇپ، خىتاي رەئىسى شى جىنپىڭنىڭ ماختىشىغا ئېرىشكەن. باشقىلارنىڭ مەزكۇر ئوبزورنىڭ مەقسىتىنى چۈشەنمەي قېلىشىنىڭ ئالدىنى ئېلىش ئۈچۈن، خىتاينىڭ خوڭكوڭ سىياسىتىنى نازارەت قىلىدىغان ھۆكۈمەت ئورگىنى بۇ ماقالىنى ئۆز تور بېتىدە دەرھال تارقاتقان.

تەييارلىغۇچى: ئابدۇخەبەر رەجەپ