ياۋروپا پارلامېنتى خۇاۋېيغا مۇناسىۋەتلىك پارىخورلۇق دېلوسىنى تەكشۈرۈشكە باشلىغان

ياۋروپا پارلامېنتى خىتاينىڭ خۇاۋېي شىركىتىگە ئالاقىدار پارىخورلۇق دېلوسى ھەققىدىكى تەكشۈرۈشنى باشلىغان.

ئەلجەزىرە قانىلىنىڭ 14-مارت خەۋەر قىلىشىچە، بېلگىيە دائىرىلىرى ياۋروپا پارلامېنتىنىڭ خىتاي تېخنىكا شىركىتى خۇاۋېيغا قاراتقان پارىخورلۇقنى تەكشۈرۈش ھەرىكىتىدە بىر قانچە كىشىنى قولغا ئالغان. گۇماندارلار 2021-يىلىدىن باشلاپ پارىخورلۇق قىلمىشلىرى بىلەن شۇغۇللانغان بولۇپ، خۇاۋېيغا لوبىچىلىق قىلىش نامىدا، پارا بېرىش قىلمىشلىرىنى قىممەتلىك سوۋغاتلار، يىغىلىشلار، زىياپەتلەر بىلەن نىقابلىغان.

تەكشۈرگۈچىلەر يەنە يىغىن چىقىملىرى بىلەن مۇناسىۋەتلىك پۇل يۇيۇش مەسىلىسىنى تەكشۈرمەكتىكەن. بېلگىيە ۋە پورتۇگالىيەدىكى 21 ئورۇن ئاختۇرۇلغاندىن كېيىن، بىر سوتچى ئىستراسبۇرگدىكى ئىككى پارلامېنت ياردەمچىسىنىڭ ئىشخانىلىرىنى پېچەتلەش بۇيرۇقىنى چىقارغان، ئەمما گۇماندارلار ھەققىدىكى تەپسىلاتلار تېخى ئاشكارىلانمىغان.

نۆۋەتتە خۇاۋېي شىركىتىنىڭ ياۋروپادا تەستىقلانغان توققۇز ۋەكىلى بار بولۇپ، ئۇلارنىڭ ياۋروپا پارلامېنت ئەزالىرى بىلەن كۆرۈشۈش ھوقۇقى بار ئىكەن. ئەمما نۆۋەتتە ئۇلارنىڭ پارلامېنت بىناسىغا كىرىشى چەكلەنگەن.

تەييارلىغۇچى: ئابدۇخەبەر رەجەپ