ب د ت ئىسلام ئۆچمەنلىكى ھەرىكەتلىرىگە قارشى تەدبىر قوللىنىشقا چاقىرىق قىلدى

بىرلەشكەن دۆلەتلەر تەشكىلاتىنىڭ باش كاتىپى ئانتونىئو گۇتېرېس بارغانسېرى ئېغىرلاشقان ئىسلام ئۆچمەنلىكىگە قارشى تۇرۇش ئۈچۈن، خەلقئارا جەمئىيەتنى بۇ توغرۇلۇق ھەرىكەت قىلىشقا چاقىرغان.

ئەلجەزىرە قانىلىنىڭ 15-مارت خەۋەر قىلىشىچە، بىرلەشكەن دۆلەتلەر تەشكىلاتىنىڭ باش كاتىپى ئانتونىئو گۇتېرېس مۇسۇلمانلارغا قارشى ھەرىكەتلەرنىڭ ھەيران قالارلىق دەرىجىدە كۆپىيىشىدىن ئەندىشە قىلىۋاتقانلىقىنى بىلدۈرۈپ، ھەر قايسى دۆلەت ھۆكۈمەتلىرىنى دىنىي ئەركىنلىكنى قوغداشقا چاقىرغان ۋە ھەرقايسى تور سۇپىلىرىنىڭ مۇسۇلمانلارغا قارشى ئۆچمەنلىك سۆزلىرىنى يوقىتىشنى تەلەپ قىلغان.

ئۇ 15-مارت «خەلقئارا ئىسلام ئۆچمەنلىكىگە قارشى تۇرۇش كۈنى» مۇناسىۋىتى بىلەن قىلغان سۆزىدە يۇقىرىقى پىكىرلەرنى بىلدۈرگەن. گۇتېرېس مۇسۇلمانلارغا قارىتىلغان ئىرقىي كەمسىتىش ۋە زوراۋانلىق ھەرىكەتلىرى، شۇنداقلا دىنىي سورۇنلارغا قىلىنغان ھۇجۇملارنى ئۆز ئىچىگە ئالغان كەڭ دائىرىلىك چىدىغۇسىز ۋەقەلەرنىڭ مەيدانغا كېلىۋاتقانلىقىنى تەكىتلىگەن.

بىلدۈرۈلۈشىچە، مۇسۇلمانلارغا قارشى ئۆچمەنلىك غەززە رايونىدا داۋام قىلىۋاتقان ئۇرۇش ۋە مۇسۇلمانلارنى قارىلايدىغان سىياسىي بايانلار سەۋەبىدىن تېخىمۇ ئېغىرلاشقان. بىرلەشكەن دۆلەتلەر تەشكىلاتىنىڭ مۇئاۋىن باش كاتىپى مىگېل ئانگېل موراتىنوس بۇ ھەقتىكى ئەندىشىلىرىنى، مۇسۇلمانلار دۇچ كېلىۋاتقان سىستېمىلىق كەمسىتىش ۋە ئىجتىمائىي، ئىقتىسادىي قىيىنچىلىقلارنى تىلغا ئېلىپ، بۇ مەسىلىلەرنىڭ كۆپىنچە تەرەپباز مېدىيالار ۋە سىياسىي بايانلار سەۋەبلىك كۈچەيگەنلىكىنى بىلدۈرگەن.

ئامېرىكا - ئىسلام مۇناسىۋەتلىرى كېڭىشى يېقىندا تەييارلىغان بىر دوكلاتتا كۆرسىتىلىشىچە، 2022-يىلى غەيرى مۇسۇلمانلارنىڭ مۇسۇلمانلارغا قارشى ھەرىكەتلىرى ھەققىدىكى شىكايەت سانى يېڭىدىن يۇقىرى پەللىگە چىققان بولۇپ، ئالدىنقى يىلغا سېلىشتۇرغاندا %7.4 كۆپەيگەن.

بىرلەشكەن دۆلەتلەر تەشكىلاتى باراۋەرلىك ۋە ئىنسانىي ھوقۇقلارنى قوغداش ئۈچۈن، بارغانسېرى كۈچىيىۋاتقان، قوبۇل قىلغىلى بولمايدىغان كەمسىتىش ۋەقەلىرىگە قارشى بىرلىكتە تىرىشچانلىق كۆرسىتىشكە چاقىرىق قىلغان.

تەييارلىغۇچى: ئابدۇخەبەر رەجەپ