پاكىستان ھىندىستاننى تېررورلۇق ھەرىكەتلىرىنى قوللاش بىلەن ئەيىبلىدى

ئالدىنقى ھەپتە يۈز بەرگەن پويىز بۇلاش ۋەقەسىدىن كېيىن، پاكىستان ھۆكۈمىتى ھىندىستاننى تېررورلۇق پائالىيەتلەرنى قوللاش بىلەن ئەيىبلىدى.

ئەنگلىيە «مۇستەقىل گېزىتى»نىڭ 15-مارت خەۋەر قىلىشىچە، پاكىستان ئارمىيەسى ھىندىستاننى ئىسيانچىلارنى قوللاش بىلەن ئەيىبلىگەن بولۇپ، ھىندىستان بۇنى رەت قىلغان. بۇ ئەيىبلەش پاكىستاننىڭ بەلۇجىستان ئۆلكىسىدە بەلۇجىستان ئازادلىق ئارمىيەسىنىڭ بىر پويىزغا قىلغان ئەجەللىك ھۇجۇمىدىن كېيىن ئوتتۇرىغا قويۇلغان بولۇپ، ھۇجۇمدا 26 كىشى قازا قىلغان.

خەۋەردە بىلدۈرۈلۈشىچە، بەلۇجىستان ئازادلىق تەشكىلاتى بۇ رايوندا تېخىمۇ كەڭ ئاپتونومىيە ھوقۇقى ۋە بايلىقتىن پايدىلىنىش ھوقۇقى تەلەپ قىلىۋاتقان بولۇپ، ئۇلار بۇرۇنمۇ پويىزلارغا بىر قانچە قېتىم ھۇجۇم قىلغان. پاكىستان ئەمەلدارلىرى بۇ قېتىمقى ھۇجۇمنىڭ ئافغانىستان تەرىپىدىن ماسلاشتۇرۇلغانلىقىغا ئىشارەت قىلغان. ئافغانىستان بولسا ئۆزىنىڭ بۇ ھەرىكەتكە چېتىشلىق ئىكەنلىكىنى رەت قىلغان. ۋەقەدىن كېيىن، پاكىستان ئارمىيەسى بەلۇجىستان ئۆلكىسىدىكى پويىز قاتنىشىنى ۋاقىتلىق توختىتىپ قويغان.

بەلۇجىستان ئۆلكىسىنىڭ مىللىي زىددىيەت ۋە كەمسىتىش ھەققىدىكى ھۆكۈمەتكە قارشى شىكايەتلىرى ئۇزۇن تارىخىي جەريانلاردا شەكىللەنگەن بولۇپ، بۇ زىددىيەتلەر ئۈزلۈكسىز داۋام قىلماقتىكەن.

تەييارلىغۇچى: ئابدۇخەبەر رەجەپ