ياۋروپا پارلامېنتى تايلاندنىڭ ئۇيغۇرلارنى خىتايغا قايتۇرۇشىنى ئەيىبلىدى

ياۋروپا پارلامېنتى 13-مارت تايلاند ھۆكۈمىتىنىڭ ئۇيغۇرلارنى خىتايغا قايتۇرۇپ بەرگەنلىكىنى ئەيىبلەيدىغان قارارنى ماقۇللىغان. پارلامېنت ئەزالىرى يەنە ياۋروپا ئىتتىپاقى كومىتېتىنى ئەركىن سودا كېلىشىمى سۆھبىتىدىن پايدىلىنىپ، تايلاندنىڭ پادىشاھقا ھاقارەت قىلىش قانۇنىنى ئىسلاھ قىلىش، سىياسىي مەھبۇسلارنى قويۇپ بېرىش ۋە قالغان ئۇيغۇرلارنى قايتۇرۇشنى توختىتىش ئۈچۈن بېسىم ئىشلىتىشكە چاقىرغان.

قارار لايىھەسىدە بۇ يىل 27-فېۋرال تايلاند ھۆكۈمىتىنىڭ خەلقئارا قانۇننى بۇزۇپ، 40 ئۇيغۇر مۇساپىرنى خىتايغا قايتۇرۇپ بەرگەنلىكى، قايتۇرۇلغان ئۇيغۇرلارنىڭ خىتايدا خالىغانچە تۇتقۇن قىلىنىش، قىيىن-قىستاققا ئېلىنىش ۋە ئېغىر ئىنسانىي ھوقۇق دەپسەندىچىلىكىگە ئۇچراش خەۋپىگە دۇچ كېلىدىغانلىقى، باشقا بىخەتەر دۆلەتلەر بۇ ئۇيغۇر مۇساپىرلارنى قوبۇل قىلىشنى تەكلىپ قىلغان بولسىمۇ، بىراق تايلاند ھۆكۈمىتىنىڭ تەكلىپلەرنى رەت قىلغانلىقى قەيت قىلىنغان.

قارار لايىھەسىدە يەنە مەزكۇر ئۇيغۇرلار قايتۇرۇلۇشتىن ئىلگىرى تايلاند كۆچمەنلەر مەركەزلىرىدە ئون يىلدىن ئارتۇق تۇتۇپ تۇرۇلغانلىقى، ئۇ يەردىكى ناچار شارائىتلار سەۋەبىدىن ئاز دېگەندە بەش ئۇيغۇرنىڭ قازا قىلغانلىقى، تايلاندنىڭ بۇ قېتىم 40 ئۇيغۇرنى خىتايغا ئۆتكۈزۈپ بېرىش قىلمىشىنىڭ خەلقئارالىق پۇقرالار ۋە سىياسىي ھوقۇقلار كېلىشىمىدىكى (ICCPR) مەجبۇرىيەتلىرىگە خىلاپ ئىكەنلىكى بىلدۈرۈلگەن.

تەييارلىغۇچى: ئابدۇخەبەر رەجەپ