تۈركىيە كۆچمەنلەر ئىدارىسى قايتۇرۇش قارارى چىقىرىلغان ئۇيغۇرلار ھەققىدە بايانات ئېلان قىلدى

ئىستانبۇل 16- ۋە 18-مەمۇرىي سوت مەھكىمىلىرىنىڭ تۈركىيەدە ياشاۋاتقان ئەركىن ئابدۇۋەلى ۋە مەھمۇد ئىنايەت ئىسىملىك ئىككى ئۇيغۇرنى خىتايغا قايتۇرۇش ھەققىدە قارار چىقارغانلىقى ھەققىدە خەۋەر تارقىلىپ، كۈچلۈك غۇلغۇلا قوزغىغاندىن كېيىن، تۈركىيە كۆچمەنلەر ئىدارىسى بۇ ھەقتە بايانات ئېلان قىلدى.

باياناتتا بىر قىسىم ئاخبارات ئورگانلىرى ۋە ئىجتىمائىي تاراتقۇ ھېسابلىرىدا تارقالغان سوت مەھكىمىسىنىڭ ئىككى ئۇيغۇرنى خىتايغا قايتۇرۇش قارارى چىقارغانلىقىغا مۇناسىۋەتلىك خەۋەرنىڭ ھەقىقەتكە ئۇيغۇن ئەمەسلىكى بىلدۈرۈلگەن.

باياناتتا يەنە 6458-نومۇرلۇق چەت ئەللىكلەر ۋە خەلقئارالىق ھىمايە قانۇنىنىڭ «چېگرادىن قوغلاپ چىقىرىش چەكلىمىسى» ماۋزۇسى ئاستىدىكى 4-ماددىسىنىڭ چەت ئەللىكلەر ھەققىدىكى خىزمەتلەردە ئەستايىدىللىق بىلەن ئىجرا قىلىنغانلىقى، بۇنىڭغا ئاساسەن ھېچكىمنىڭ قىيىن-قىستاققا ئۇچراش خەۋپىگە ئۇچرايدىغان ۋە ئىرقى، دىنى، مەلۇم ئىجتىمائىي گۇرۇپپىغا تەۋەلىكى ياكى سىياسىي پىكىرلىرى سەۋەبلىك ھاياتى ياكى ئەركىنلىكى تەھدىتكە ئۇچرايدىغان بىر يەرگە ئەۋەتىلمەيدىغانلىقى بىلدۈرۈلگەن.

باياناتنىڭ ئاخىرىدا تىلغا ئېلىنغان شەخسلەرنى خىتايغا قايتۇرۇش قارارى چىققانلىق ھەققىدىكى بايانلارنىڭ رېئاللىققا پۈتۈنلەي ئۇيغۇن ئەمەسلىكى، بۈگۈنگە قەدەر ھېچبىر ئۇيغۇرنىڭ خىتايغا ئەۋەتىلمىگەنلىكى، مەھمۇد ئىنايەتنىڭ ئۆز تەلىپىگە ئاساسەن، ئائىلىسى ياشاۋاتقان بىر غەرب دۆلىتىگە ئۆز ئىختىيارى بىلەن كەتكەنلىكى، ئەركىن ئابدۇۋەلى ھەققىدىكى نازارەت قارارىنىڭ 2023-يىلى ئەمەلدىن قالدۇرۇلغانلىقى قەيت قىلىنغان.