خىتاي ئەمەلدارى تەيۋەنگە يەنە تەھدىت سالدى

خىتاينىڭ يۇقىرى دەرىجىلىك ئەمەلدارى تەيۋەن مۇستەقىللىقى ۋە چەت ئەل كۈچلىرىگە قارشى تۇرۇش قانۇنىنى مۇكەممەللەشتۈرۈش كېرەكلىكىنى دەۋا قىلدى.

جەنۇبى خىتاي سەھەر پوچتىسىنىڭ 14-مارت خەۋەر قىلىشىچە، خىتاينىڭ يۇقىرى دەرىجىلىك ئەمەلدارى جاۋ لېجى بېيجىڭدا ئۆتكۈزۈلگەن خىتاينىڭ بۆلگۈنچىلىككە قارشى تۇرۇش قانۇنىنىڭ 20 يىللىقىنى خاتىرىلەش يىغىنىدا، تەيۋەن مۇستەقىللىقىغا قارشى قانۇنىي تەدبىرلەرنى كۈچەيتىشنىڭ زۆرۈرلۈكىنى تەكىتلىگەن. ئۇ خىتاينىڭ تەيۋەن بۆلگۈنچىلىكى ۋە چەت ئەل مۇداخىلىسىگە قەتئىي قارشى تۇرۇشى كېرەكلىكىنى، شۇنداقلا مۇستەقىللىقنى قوللايدىغان كۈچلەرنى جازالاش ئۈچۈن قانۇنىي سىستېمىنى كۈچەيتىشى كېرەكلىكىنى دەۋا قىلغان.

خەۋەردە بىلدۈرۈلۈشىچە، مەزكۇر يىغىن تەيۋەن پىرېزىدېنتى لەي چىڭدې ۋەزىپىگە ئولتۇرغاندىن كېيىنكى خىتاينىڭ تۇنجى قېتىملىق ئالاقىدار يىغىنى بولۇپ، خىتاينىڭ تەيۋەننى قوشۇۋېلىش نىيىتىنى نامايان قىلغان. بۇ يىغىنغا تاشقى ئىشلار مىنىستىرى ۋاڭ يى ۋە ھەربىي ئەمەلدارلارنى ئۆز ئىچىگە ئالغان يۇقىرى دەرىجىلىك ئەمەلدارلار قاتناشقان.

ئامېرىكا تەيۋەننىڭ ئۆزىنى قوغدىشى كېرەكلىكىنى ئوتتۇرىغا قويغان بىر ئەھۋالدا، مەزكۇر يىغىن خىتاي ئەمەلدارلىرىنىڭ تەيۋەن مەسىلىسىگە يۇقىرى دەرىجىدە دىققەت قىلىۋاتقانلىقىنى كۆرسىتىدىكەن.

تەييارلىغۇچى: ئابدۇخەبەر رەجەپ