خىتاينىڭ مال تىرانسپورتى تىرامپنىڭ سودىدىكى ئېنىقسىزلىقى سەۋەبلىك قالايمىقانلاشقان

خىتاينىڭ مال تىرانسپورتى تىرامپنىڭ سودا ساھەسىدىكى ئېنىقسىز سىياسەتلىرى ۋە قارارلىرى سەۋەبىدىن كۈچلۈك قالايمىقانچىلىق ۋە تەۋرىنىشكە دۇچ كەلگەن.

نىككېي ئاسىيا تورىنىڭ 13-مارت خەۋەر قىلىشىچە، ئاسىيالىق ئېكسپورتچىلار ماللىرىنى ئامېرىكىغا مۇددەتتىن بۇرۇن يوللاشنى داۋاملاشتۇرۇۋاتقان بولۇپ، ئامېرىكا پورتلىرى، بولۇپمۇ لوس-ئانژېلېس پورتىدىكى يۈك ساندۇقلىرىنىڭ سانى 2025-يىلىنىڭ بېشىدا رېكورت دەرىجىدە يۇقىرى ئۆرلىگەن، ھەتتا فېۋرال ئېيىدىمۇ شۇنداق بولغان. لېكىن بۇ يۆنىلىشنىڭ ئاستىلىغانلىقىنى كۆرسىتىدىغان ئالامەتلەر بار بولۇپ، خىتاينىڭ ئومۇمىي ئېكسپورت ئۆسۈش سۈرئىتى ئاستىلاشقان ۋە رايونلۇق توشۇش ھەققىمۇ تۆۋەنلىگەن.

شىركەتلەر مۇمكىن بولغان باج مىقدارى ئۆسۈشىدىن ئىلگىرى ماللىرىنى توپلاشقا ئالدىرىغان. تىرامپنىڭ ئالدىن مۆلچەرلىگىلى بولمايدىغان سودا سىياسەتلىرى، جۈملىدىن ھەر خىل تاۋار ۋە بۇيۇملارغا قويۇلغان قوشۇمچە باجلىرى ۋە خىتاي پاراخوتلىرىغا قويماقچى بولغان باجلار ئىمپورت قىلغۇچىلاردا ئېنىقسىزلىق پەيدا قىلغان.

مۇتەخەسسىسلەر بۇ سىياسەتلەرنىڭ دۇنيا مىقياسىدىكى دېڭىز تىرانسپورتىنىڭ ئۈنۈمسىزلىكىگە ۋە چىقىمنىڭ ئېشىشىغا سەۋەب بولۇشى مۇمكىنلىكى، بۇنىڭ ئىستېمال باھالىرىغا تەسىر قىلىشى مۇمكىنلىكى ھەققىدە ئاگاھلاندۇرغان. خىتاي پورتلىرىدا جىددىي قىستاڭچىلىق كۆرۈلگەن بولۇپ، تېخىمۇ كۆپ تىرانسپورت قىيىنچىلىقلىرىنى كەلتۈرۈپ چىقىرىش ئەھۋاللىرىمۇ خەۋەر قىلىنغان.

بەزى ئانالىزچىلار يۇقىرى باج تەھدىتى سەۋەبىدىن ئالدىن يوللاشنىڭ داۋاملىشىشى مۇمكىنلىكىنى پەرەز قىلغان. ئەمما باشقا شىركەتلەر تەمىنلەش زەنجىرىنى خىتايدىن باشقا جايغا يۆتكىگەنسېرى، بۇ يۆنىلىشنىڭ ئاجىزلىشىدىغانلىقى ئوتتۇرىغا قويۇلماقتا. ئومۇمىي جەھەتتىن ئېيتقاندا، ۋەزىيەت مۇقىم بولمىغان بولۇپ، تەمىنلەش زەنجىرىنىڭ ئۈزۈلۈپ قېلىش خەۋپى يەنىلا مەۋجۇت ئىكەن.

تەييارلىغۇچى: ئابدۇخەبەر رەجەپ