خىتاي ئارمىيەسى ئۇرۇش تەييارلىقى ۋە چەت ئەلگە كېڭىيىشنى تەكىتلىدى

خىتاي ئارمىيەسى ئورتاق بەلگىلىمىلەرگە تۈزىتىش كىرگۈزۈپ، ئۇرۇشقا تەييارلىق قىلىش ۋە چەت ئەلدە كېڭىيىشنى تەكىتلىگەن.

ئامېرىكا ئاۋازىنىڭ 13-مارت خەۋەر قىلىشىچە، خىتاي ئارمىيەسى يېقىندا ئۈچ ئاساسىي ھەربىي نىزامنى تۈزىتىپ، ئۇرۇشقا تەييارلىق يۆنىلىشىنى تېخىمۇ كۈچەيتكەن. يېڭى نۇسخىدىكى «خىتاي ئارمىيەسى ئىچكى ئىشلار نىزامنامىسى»، «خىتاي ئارمىيەسى ئىنتىزام نىزامنامىسى» ۋە «خىتاي ئارمىيەسى سەپ نىزامنامىسى» ئاساسىدا تۈزىتىلگەن ئورتاق نىزامنامىلەر 1-ئاپرېلدىن باشلاپ رەسمىي يولغا قويۇلىدىكەن.

ئانالىزچىلارنىڭ ئېيتىشىچە، ئاتالمىش «خەلقئارا سەۋىيەدە قوشۇن قۇرۇش»نىڭ مۇھىم كۆرسەتكۈچلىرىنىڭ بىرى توساتتىن يۈز بەرگەن ۋە ئۇزۇن مۇددەتلىك ئۇرۇشلارغا ھەر قانداق ۋاقىتتا تاقابىل تۇرۇش ئىقتىدارىغا ئىگە بولۇش ئىكەن. بۇ قېتىمقى نىزامنامە تۈزىتىشنىڭ دەل مۇشۇ نىشانغا قاراپ بېسىلغان مۇھىم بىر قەدەم ئىكەنلىكى بىلدۈرۈلگەن.

خىتاي رەئىسى شى جىنپىڭ 2-ئايدا يېڭى تۈزىتىلگەن ئورتاق نىزامنامىلەرنى رەسمىي ئېلان قىلىش ھەققىدە بۇيرۇققا ئىمزا قويغان. يېقىندىن بۇيان خىتاينىڭ رەسمىي ئاخبارات ۋاسىتىلىرى بۇ نىزامنامىلەرنى چۈشەندۈرۈش تەشۋىقاتىنى كۈچەيتىش داۋامىدا، ئاتالمىش «ئۇرۇشقا تەييارلىق قىلىش» دېگەن مەركىزىي تېمىنى قايتا-قايتا تەكىتلىگەن.

تەييارلىغۇچى: ئابدۇخەبەر رەجەپ