خىتاينىڭ پورت پىلانلىرى قوشنا دۆلەتلەرنىڭ سىياسىي ۋەزىيىتىنى قالايمىقان قىلماقتا

خىتاينىڭ پورت پىلانلىرى سابىق سوۋېت ئىتتىپاقىدىن ئايرىلىپ چىققان دۆلەتلەرنىڭ سىياسىي ۋەزىيىتىنى قالايمىقان قىلىشقا باشلىغان.

نىيۇيورك ۋاقىت گېزىتىنىڭ 13-مارت خەۋەر قىلىشىچە، گىرۇزىيەدە غەرب تەرەپدارى پائالىيەتچىلەر ھۆكۈمەتنىڭ رۇسىيە بىلەن بارغانسېرى يېقىنلىشىۋاتقان مۇناسىۋىتىدىن ئەندىشە قىلىشقا باشلىغان. ئەمما خىتاينىڭ بۇ رايوندىكى تەسىرىمۇ كۈچىيىشكە باشلىغان بولۇپ، خىتاي مەزكۇر رايوندىكى دېڭىز يوللىرىنى تەرەققىي قىلدۇرۇش ئۈچۈن ئۇل ئەسلىھە قۇرۇلۇشلىرىغا مەبلەغ سالغان.

نۆۋەتتە خىتاي ئىشچىلار گىرۇزىيەنىڭ شەرقى بىلەن غەربىنى تۇتاشتۇرىدىغان زامانىۋى تاشيول قۇرۇشنى داۋاملاشتۇرماقتىكەن. ئۇندىن باشقا، 5.5 مىل ئۇزۇنلۇقتىكى بىر تونېلنى ياساش ئارقىلىق، رۇسىيەگە بارىدىغان تېز سۈرئەتلىك تاشيولنى كېڭەيتمەكتىكەن.

بۇلاردىن سىرت، بىر خىتاي شىركىتى خىتاينىڭ ئاتالمىش «بىر بەلباغ، بىر يول» تەشەببۇسىنىڭ بىر قىسمى سۈپىتىدە قارا دېڭىزدا گىرۇزىيەنىڭ تۇنجى چوڭقۇر دېڭىز پورتىنى قۇرۇشنى پىلانلىغان. خىتاي باشلىماقچى بولغان بۇ قۇرۇلۇش تۈرى تالاش-تارتىشقا سەۋەب بولغان. مەزكۇر پورت گىرۇزىيە، ياۋروپا ۋە ئامېرىكا شىركەتلىرىدىن تەشكىل تاپقان بىر گۇرۇپپىدىن ئايرىلىپ، ئۆتكەن يىلى ماي ئېيىدا بىر خىتاي شىركىتىگە بېرىلگەن. بۇ گىرۇزىيەنىڭ غەرب ئىتتىپاقداشلىرىدىن يىراقلىشىشى ھەققىدىكى ئەندىشىلەرنى كەلتۈرۈپ چىقارغان.

تەييارلىغۇچى: ئابدۇخەبەر رەجەپ