ئىسرائىلىيەنىڭ خەۋپسىزلىك ئورگىنى 7-ئۆكتەبىردىكى خاتالىقىنى ئېتىراپ قىلدى

ئىسرائىلىيەنىڭ بىخەتەرلىك ئورگىنى شىنبەت 2023-يىلى 7-ئۆكتەبىر يۈز بەرگەن ھۇجۇم ۋەقەسىنى ئەسلىدە توسالايدىغانلىقىنى بىلدۈرۈپ، خاتالىقىنى ئېتىراپ قىلىش بىلەن بىرگە، يەنە باشقىلارنى ئەيىبلىگەن.

CNN قانىلىنىڭ 5-مارت خەۋەر قىلىشىچە، ئىسرائىلىيەنىڭ بىخەتەرلىك ئورگىنى شىنبەت ھاماسنىڭ 7-ئۆكتەبىردىكى ھۇجۇمىنىڭ ئالدىنى ئېلىشتا «مەغلۇپ بولغانلىقى»نى ئېتىراپ قىلغان ھەمدە ئاگاھلاندۇرۇش ئالامەتلىرىگە پەرۋا قىلماسلىق ۋە ھاماسنىڭ نىيىتىنى خاتا باھالاپ قېلىش قاتارلىقلارنى تىلغا ئالغان.

شىنبەتنىڭ باشلىقى رونەن بار بۇ ھەقتە: «باشقىچە ھەرىكەت قىلىنغان بولسا، 1200 دىن ئارتۇق كىشىنىڭ ئۆلۈمى ۋە 251 كىشىنىڭ تۇتقۇن قىلىنىشىغا سەۋەب بولغان بۇ ۋەقەنىڭ ئالدىنى ئالغىلى بولاتتى» دېگەن. ئۇ يەنە ئىچكى جەھەتتىن تەكشۈرۈپ ئىستىخبارات توپلاش ۋە ئەمەلىي مەسئۇلىيەت جەھەتلەردىكى يېتەرسىزلىكلەرنى ئاشكارىلىغان.

شۇنىڭ بىلەن بىرگە شىنبەت يەنە مەسئۇلىيەتنى ئىسرائىلىيە ھۆكۈمىتىنىڭ سىياسەتچىلىرىگە ئارتقان. نۆۋەتتە ئىسرائىلىيە باش مىنىستىرى نېتانياھۇ مەسئۇلىيەتنى ئۈستىگە ئالمىغانلىقى ئۈچۈن تەنقىدكە ئۇچرىغان بولۇپ، ئۆكتىچى پارتىيە ئەمەلدارلىرى نىتانياھونىڭ مەسئۇلىيەتنى شىنبەتكە دۆڭگەشكە ئۇرۇنغانلىقىنى ئەيىبلىگەن.

تەييارلىغۇچى: ئابدۇخەبەر رەجەپ