خىتاي ئامېرىكىنىڭ بىر قىسىم يېزا ئىگىلىك مەھسۇلاتلىرىغا %15 كىچە باج قويدى

خىتاي تىرامپ ھۆكۈمىتىنىڭ باج قارارىدىن ئۆچ ئېلىپ، ئامېرىكىنىڭ كالا گۆشى قاتارلىق مۇھىم يېزا ئىگىلىك مەھسۇلاتلىرىغا %15 گىچە قوشۇمچە باج قويىدىغانلىقىنى ئېلان قىلدى.

ABC نىڭ 4-مارت خەۋەر قىلىشىچە، خىتاي سەيشەنبە كۈنى گۆش، پۇرچاق قاتارلىق ئامېرىكىنىڭ مۇھىم يېزا ئىگىلىك مەھسۇلاتلىرىغا %15 گىچە قوشۇمچە باج قويىدىغانلىقىنى ئېلان قىلغان. خىتاي سودا مىنىستىرلىقى ئېلان قىلغان بۇ باج قارارى 10-مارتتىن باشلاپ كۈچكە ئىگە بولىدىكەن. بۇ تەدبىر ئامېرىكا پىرېزىدېنتى دونالد تىرامپنىڭ خىتاي ماللىرىغا %20 قوشۇمچە باج قويۇش بۇيرۇقىغا جاۋاب قايتۇرۇش ھېسابلىنىدىكەن.

خەۋەرلەرگە ئاساسلانغاندا، ئامېرىكىدا ئىشلەپچىقىرىلغان توخۇ گۆشى، بۇغداي، قوناق ۋە پاختا %15 قوشۇمچە باجغا دۇچ كېلىدىكەن. سېرىق پۇرچاق، كالا گۆشى، دېڭىز مەھسۇلاتلىرى، مېۋە، كۆكتات ۋە سۈت قاتارلىق مەھسۇلاتلاردىن ئېلىنىدىغان باج %10 ئۆستۈرۈلىدىكەن.

خىتاي رېجىمى سەيشەنبە كۈنى يەنە 15 ئامېرىكا شىركىتىنى ئىشەنچسىز ئورگانلار تىزىملىكىگە كىرگۈزگەن. خىتاي بۇ ئارقىلىق مەزكۇر شىركەتلەرنىڭ خىتاي بىلەن مۇناسىۋەتلىك ئىمپورت-ئېكسپورت پائالىيەتلىرىگە قاتنىشىشىنى، خىتايدا يېڭى مەبلەغ سېلىشىنى چەكلىشى مۇمكىن ئىكەن.

خىتاي سودا مىنىستىرلىقى بىر باياناتتا: «خىتاينىڭ دۆلەت بىخەتەرلىكى ۋە مەنپەئەتلىرىگە زىيان يەتكۈزگەن 15 ئامېرىكا شىركىتىنى ئېكسپورت كونترول تىزىملىكىگە كىرگۈزۈپ، ئۇلارغا قوش ئىشلىتىشچان بۇيۇملارنى ئېكسپورت قىلىشنى چەكلەش قارار قىلىندى» دېگەنلەرنى دەۋا قىلغان.

تەييارلىغۇچى: ئابدۇخەبەر رەجەپ