ئامېرىكا ھۆكۈمىتى رۇسىيەگە قارىتىلغان تور ھەرىكەتلىرىنى ۋاقىتلىق توختاتتى

ئامېرىكا ھۆكۈمىتى يىللاردىن بېرى داۋاملاشتۇرۇۋاتقان، رۇسىيەگە قارىتىلغان ھۇجۇم خاراكتېرلىك تور ھەرىكەتلىرىنى ۋاقىتلىق توختاتقان.

CNN قانىلىنىڭ 3-مارت خەۋەر قىلىشىچە، ئامېرىكا ھۆكۈمىتى رۇسىيەگە قارىتىلغان ھۇجۇم خاراكتېرلىك تور ھەرىكەتلىرىنى ۋاقىتلىق توختاتقان بولۇپ، بۇ قارار بەزى ئەمەلدارلار تەرىپىدىن «چوڭ زەربە» دەپ سۈپەتلەنگەن.

بىلدۈرۈلۈشىچە، رۇسىيە كۈچلۈك خاككېرلارغا ئىگە بولغانلىقى ئۈچۈن، بۇ ۋاقىتلىق توختىتىش ئامېرىكىدا رۇسىيەنىڭ تور ھۇجۇملىرىنىڭ كۆپىيىشى ھەققىدە ئەندىشە پەيدا قىلغان. بۇ قەدەم تىرامپ ھۆكۈمىتىنىڭ رۇسىيە-ئۇكرائىنا ئۇرۇشى داۋاملىشىۋاتقان مەزگىلدە رۇسىيە بىلەن بولغان مۇناسىۋەتنى ياخشىلاش تىرىشچانلىقى بىلەن ماس كەلگەن.

تور ھۇجۇمى ۋە مۇداپىئە خاراكتېرلىك ۋەزىپىلەرگە مەسئۇل بولغان تور قوماندانلىق ئىشتابى رۇسىيەدىن كەلگەن تور تەھدىتلىرىنى بىر تەرەپ قىلىشتا مۇھىم رول ئوينايدىغان بولۇپ، ئامېرىكا بىلەن رۇسىيە ئوتتۇرىسىدىكى تور تالاش-تارتىشلىرى داۋاملىشىۋاتقان بىر مەزگىلدە، ئىككى تەرەپ مۇھىم ئۇل ئەسلىھەلەرنى ئۆزئارا نىشانغا ئېلىپ كەلگەن.

نۆۋەتتە مەزكۇر ۋاقىتلىق توختىتىش تەدبىرىنىڭ قاچانغىچە داۋاملىشىدىغانلىقى نامەلۇم ئىكەن.

تەييارلىغۇچى: ئابدۇخەبەر رەجەپ