تالىبان ئامېرىكا ھاۋا ئارمىيە بازىسىدا خىتاينىڭ مەۋجۇتلۇقىنى رەت قىلدى

تالىبان ھۆكۈمىتى تىرامپنىڭ ئامېرىكىنىڭ ئافغانىستاندىكى بۇرۇنقى ھاۋا ئارمىيە بازىسىدا خىتاي ئارمىيەسىنىڭ مەۋجۇتلۇقى ھەققىدىكى بايانلىرىنى رەت قىلدى.

جەنۇبىي خىتاي سەھەر گېزىتىنىڭ 3-مارت خەۋەر قىلىشىچە، يېقىندا ئافغانىستان دۆلەت تېلېۋىزىيەنىڭ زىيارىتىنى قوبۇل قىلغان ئافغانىستان ھۆكۈمىتى باياناتچىسى زەبىھۇللاھ مۇجاھىد ئامېرىكا پىرېزىدېنتى دونالد تىرامپنىڭ ئافغانىستاندىكى باغرام ھاۋا ئارمىيە بازىسىدا خىتاي ئارمىيەسىنىڭ مەۋجۇتلۇقى ھەققىدىكى بايانلىرىغا جاۋاب بەرگەن.

ئۇ تىرامپنىڭ سۆزلىرىنى رەت قىلىپ، بۇ سۆزلەرنىڭ ھېسسىياتچان ۋە خاتا ئۇچۇرلارغا ئاساسلانغانلىقىنى، ئافغانىستاندا خىتاي ئارمىيەسىنىڭ يوقلۇقىنى ۋە باغرام ھاۋا ئارمىيە بازىسىنىڭ تالىبان كونتروللۇقىدا ئىكەنلىكىنى ئوتتۇرىغا قويغان.

ئۇ يەنە مۇخبىرغا ئامېرىكا ئافغانىستاندا قالدۇرۇپ كەتكەن ھەربىي ئۈسكۈنىلەرنىڭ سابىق ئافغانىستان ھۆكۈمىتىگە تەۋە ئىكەنلىكىنى، تالىبان بۇ ئۈسكۈنىلەرنى دۆلەت مۇداپىئەسى ئۈچۈن ئىشلىتىشنى پىلانلىغانلىقىنى، ئامېرىكا تاشلاپ كەتكەن ئەسلىھەلەرنىڭ ئۇرۇش غەنىيمەتلىرى دەپ قارىلىدىغانلىقىنى بىلدۈرگەن.

زەبىھۇللاھ مۇجاھىد سۆزىدە يەنە تالىباننىڭ ئامېرىكىنىڭ 20 يىللىق ھەربىي ئىشغالىيەت مەزگىلىدە قىلغان بۇزغۇنچىلىقلىرى ئۈچۈن تۆلەم تۆلىشىنى ئۈمىد قىلىدىغانلىقىنى تىلغا ئالغان. ئامېرىكا 2001-يىلى 11-سېنتەبىر ۋەقەسىدىن كېيىن ئافغانىستانغا باستۇرۇپ كىرگەن. ئامېرىكانىڭ چېكىنىشى 2021-يىلى 8-ئايدا ئاياغلاشقان بولۇپ، ئارقىدىن تالىبان بىلەن تىنچلىق كېلىشىمى تۈزۈلگەن.

تەييارلىغۇچى: ئابدۇخەبەر رەجەپ