شى جىنپىڭ بىلەن شويگۇنىڭ كۆرۈشۈشى دىققەت قوزغىدى

ئامېرىكا رۇسىيە بىلەن مۇناسىۋىتىنى ياخشىلاشقا تىرىشىۋاتقان بىر پەيتتە، شى جىنپىڭ بىلەن رۇسىيەنىڭ ئەڭ يۇقىرى دەرىجىلىك خەپسىزلىك ئەمەلدارى شويگۇنىڭ ئۇچرىشىشى دىققەت قوزغىدى.

ئامېرىكا ئاۋازىنىڭ خەۋەر قىلىشىچە، خىتاي رەئىسى شى جىنپىڭ 28-فېۋرال رۇسىيە خەۋپسىزلىك كېڭىشىنىڭ باش كاتىپى، سابىق مۇداپىئە مىنىستىرى سېرگېي شويگۇ بىلەن بېيجىڭدا كۆرۈشكەن بولۇپ، شى جىنپىڭ خىتاي بىلەن رۇسىيەنىڭ دوستلۇقىنىڭ تاۋلانغان پولاتتەك مۇستەھكەم ئىكەنلىكىنى، خەلقئارالىق ۋە رايونلۇق مەسىلىلەردە ھەمكارلىقنى داۋاملىق كۈچەيتىپ، ھەر جەھەتتىكى ئىستراتېگىيەلىك ھەمكارلىقىنى ئەمەلگە ئاشۇرۇش كېرەكلىكىنى دەۋا قىلغان.

بىلدۈرۈلۈشىچە، شويگۇ رۇسىيە مۇداپىئە مىنىستىرى بولغان مەزگىلدە، رۇسىيە پىرېزىدېنتى ۋىلادىمىر پۇتىنغا ئۇكرائىناغا قارشى ئومۇميۈزلۈك ئۇرۇش قوزغاش قارارىنى چىقىرىشقا مۇھىم تەسىر كۆرسەتكەن شەخس دەپ قارالغان. بۇ قېتىم ئۇ رۇسىيە خەۋپسىزلىك كېڭىشىنىڭ باش كاتىپى سۈپىتىدە، ھىندونېزىيە ۋە مالايشىياغا قىلغان زىيارىتىنى ئاخىرلاشتۇرۇپ، بېيجىڭنى بىر كۈنلۈك زىيارەت قىلغان.

ئۇ شى جىنپىڭ بىلەن كۆرۈشۈشتىن بۇرۇن، خىتاي كومپارتىيەسى مەركىزىي كومىتېتى سىياسىي بىيۇروسىنىڭ ئەزاسى، خىتاي تاشقى ئىشلار مىنىستىرى ۋاڭ يى بىلەن سۆھبەتلەشكەن.

شى جىنپىڭ شويگۇ بىلەن كۆرۈشكەندە، بۇ يىل خىتاينىڭ ياپونىيەگە قارشى ئۇرۇشى، رۇسىيەنىڭ ۋەتەن قوغداش ئۇرۇشى ۋە بىرلەشكەن دۆلەتلەر تەشكىلاتى قۇرۇلغانلىقىنىڭ 80 يىللىقىغا توغرا كەلگەنلىكى، شۇڭا ئالاھىدە تارىخىي ئەھمىيەتكە ئىگە يىل ئىكەنلىكىنى بىلدۈرگەن.

شىنخۇا ئاگېنتلىقىنىڭ خەۋەر قىلىشىچە، شى جىنپىڭ كۆرۈشۈشتە: «ئىككى تەرەپنىڭ ھەر دەرىجىلىك ئەمەلدارلىرى زىچ ئالاقىنى ساقلاش، مەن بىلەن پىرېزىدېنت پۇتىن ئوتتۇرىسىدا قولغا كەلتۈرگەن ئورتاق تونۇشنى ھەر تەرەپلىمە ئەمەلگە ئاشۇرۇش، مەڭگۈلۈك قوشنىدارچىلىق دوستلۇقى، ھەر تەرەپلىمە ئىستراتېگىيەلىك ھەمكارلىق ۋە ئۆزئارا پايدىلىق ھەمكارلىق ئارقىلىق ئورتاق ئۇتۇققا ئېرىشىشنى مەقسەت قىلغان يېڭى دەۋردىكى خىتاي-رۇسىيە مۇناسىۋىتىنىڭ روھىي يادروسىنى كۈچلەندۈرۈش كېرەك» دېگەنلەرنى دەۋا قىلغان.

ئۈچ يىل بۇرۇن پۇتىن ئۇكرائىناغا قارشى ئومۇميۈزلۈك تاجاۋۇزچىلىق ئۇرۇشى قوزغاشنىڭ ئالدىدا بېيجىڭغا زىيارەتكە بېرىپ، شى جىنپىڭ بىلەن كۆرۈشكەن. ئىككى تەرەپ يىغىندىن كېيىن بىر قاتار «چېكى يوق ھەمكارلىق» دەپ ئاتالغان ئىككى تەرەپلىك كېلىشىملەرگە ئىمزا قويغان. رۇسىيە-ئۇكرائىنا ئۇرۇشى پارتلىغاندىن كېيىن، خىتاي ئۆزىنىڭ پوزىتسىيەسىنىڭ بىتەرەپ ئىكەنلىكىنى، غەرب دۆلەتلىرىنىڭ موسكۋاغا قاراتقان جازا تەدبىرلىرىگە قاتناشمايدىغانلىقىنى بىلدۈرگەن بولسىمۇ، پۇرسەتتىن پايدىلىنىپ رۇسىيە بىلەن بولغان سىياسىي، ئىقتىسادىي ۋە ھەربىي ھەمكارلىق مۇناسىۋىتىنى كېڭەيتكەن.

نۆۋەتتە ئامېرىكا پىرېزىدېنتى دونالد تىرامپ رۇسىيە-ئۇكرائىنا ئۇرۇشىنى ئاخىرلاشتۇرۇشقا تىرىشىۋاتقان بولۇپ، ئانالىزچىلار خىتاي-رۇسىيە مۇناسىۋىتىنى بۇزۇشنىڭ قىيىن ئىكەنلىكىنى، ئەمما ئامېرىكىنىڭ ئىككى تەرەپنىڭ ھەمكارلىق سەۋىيەسىگە تەسىر كۆرسىتەلىشى مۇمكىنلىكىنى بىلدۈرۈشمەكتە.

تەييارلىغۇچى: ئابدۇخەبەر رەجەپ