مالايشىيادا قۇرۇلغان كوكائىن تەجرىبىخانىسى خىتايلارغا چېتىشلىق چىقتى

مالايشىيادا تۆت كىشى كوكائىن تەجرىبىخانىسى قۇرغانلىقى سەۋەبلىك ئەيىبلەنگەن بولۇپ، ئۇلارنىڭ ئۈچىنىڭ خىتاي ئىكەنلىكى ئاشكارىلاندى.

جەنۇبىي خىتاي سەھەر پوچتىسى گېزىتىنىڭ 1-مارت خەۋەر قىلىشىچە، ئۈچ خىتاينى ئۆز ئىچىگە ئالغان تۆت كىشى مالايشىيانىڭ سېلانگور ئىشتاتىنىڭ نىلاي رايونىدا كوكائىن تەجرىبىخانىسى قۇرۇش، كوكائىن ئىشلەپچىقىرىش ۋە سېتىش جىنايىتى بىلەن ئەيىبلەنگەن. بۇ جىنايەت بېكىتىلگەن تەقدىردە، ئۇلار ئۆلۈم جازاسى ياكى 30 يىلدىن 40 يىلغىچە قاماق جازاسىغا ھۆكۈم قىلىنىشى مۇمكىن ئىكەن.

مەزكۇر گۇماندارلارنىڭ ئەيىبنامىسى 17-فېۋرالدا سۇنۇلغان بولۇپ، ئالاقىدار سوت 24-ئاپرېل ئېچىلىدىكەن. نۆۋەتتە ئۇلارنىڭ كېپىللىككە قويۇپ بېرىش ئىلتىماسلىرىمۇ رەت قىلىنغان.

بىلدۈرۈلۈشىچە، ئالاقىدار ئورگانلار مەزكۇر تەجرىبىخانىغا تۇيۇقسىز باستۇرۇپ كىرىپ، تەخمىنەن 720 مىڭ ئامېرىكا دوللىرى قىممىتىدىكى زەھەرلىك چېكىملىك، نەق پۇل ۋە باشقا قىممەتلىك بۇيۇملارنى قولغا چۈشۈرگەن.

تەييارلىغۇچى: ئابدۇخەبەر رەجەپ