خىتاي جاسۇسلىرى بىلەن فىلىپپىن ساقچىلىرىنىڭ يوشۇرۇن مۇناسىۋىتى ئاشكارىلاندى

خىتاي جاسۇسلۇق گۇماندارلىرىنىڭ فىلىپپىندىكى بىر شەھەرلىك ھۆكۈمەت ۋە ساقچىلارغا نەق پۇل، موتوسىكلىت ئىئانە قىلغانلىقى ئاشكارىلاندى.

رويتېرس ئاگېنتلىقىنىڭ خەۋەر قىلىشىچە، فىلىپپىندا جاسۇسلۇق قىلمىشى بىلەن ئەيىبلەنگەن تۆت خىتاي پۇقراسى باشچىلىقىدىكى خىتايپەرەس گۇرۇپپا فىلىپپىندىكى بىر شەھەرلىك ھۆكۈمەتكە نەق پۇل ئىئانە قىلغان ۋە ئىككى ساقچى ئورگىنىغا موتوسىكلىت سوۋغا قىلغان.

مۇخبىرلار ئىگىلىگەن سۈرەت، سىن ۋە توردا بايقالغان پاكىتلارغا ئاساسلانغاندا، فىلىپپىن ھۆكۈمىتى 1-ئاينىڭ ئاخىرىدا بەش خىتاينى جەنۇبىي دېڭىزغا يېقىن جايلاردىكى فىلىپپىن دېڭىز ئارمىيەسىگە ئائىت سۈرەت ۋە خەرىتىلەرنى توپلاش قىلمىشى بىلەن ئەيىبلىگەن بولۇپ، ئۇلارنى ھەممىسىنى جاسۇسلۇق گۇمانى بىلەن قولغا ئالغان. بۇلارنىڭ ئىچىدىكى تۆتى خىتاي پۇقراسى ئىكەن.

فىلىپپىن دۆلەت تەكشۈرۈش ئىدارىسىنىڭ بىلدۈرۈشىچە، بۇ بەش گۇماندار ئۇچقۇچىسىز ھاۋا ئاپپاراتى ئىشلىتىپ، فىلىپپىن دېڭىز ئارمىيەسىگە قارىتىلغان جاسۇسلۇق ھەرىكەتلىرى بىلەن شۇغۇللانغان. ئۇلارنىڭ يانفونلىرىدىن سەزگۈر ھەربىي ئورۇنلار ۋە پاراخوتلارنىڭ سۈرەتلىرى، خەرىتىلىرى تېپىلغان. دۆلەتلىك تەكشۈرۈش ئىدارىسىنىڭ بىر يۇقىرى دەرىجىلىك ئەمەلدارىنىڭ بىلدۈرۈشىچە، ئۇلارنىڭ جىنايىتى بېكىتىلگەن تەقدىردە، 20 يىللىق قاماق جازاسىغا ھۆكۈم قىلىنىدىكەن.

رويتېرس ئاگېنتلىقىنىڭ كۆرسىتىشىچە، يۇقىرىقى تۆت كىشى خىتاي كومپارتىيەسى بىرلىكسەپ ئورگىنىغا چېتىشلىق پۇقراۋى گۇرۇپپىنىڭ باشلىقلىرى ئىكەن. نۆۋەتتە خىتاينىڭ فىلىپپىندىكى ئەلچىخانىسى بۇ ھەقتىكى سوئاللارغا جاۋاب قايتۇرمىغان.

تەييارلىغۇچى: ئابدۇخەبەر رەجەپ