غەرب ئەللىرى زېلېنسكىينى قوللايدىغانلىقىنى بىلدۈردى

تىرامپنىڭ ياۋروپا ئىتتىپاقى بىلەن بولغان مۇناسىۋىتى يىرىكلەشكەندىن كېيىن، ئامېرىكىنىڭ غەربتىكى ئىتتىپاقداشلىرى زېلېنسكىينى قوللايدىغانلىقىنى بىلدۈرۈشمەكتە.

CNN قانىلىنىڭ 1-مارت خەۋەر قىلىشىچە، دونالد تىرامپ بىلەن ۋىلادىمىر زېلېنسكىي ئوتتۇرىسىدىكى دەتالاشقا سەۋەب بولغان ئۇچرىشىش ئامېرىكا ۋە ئۇنىڭ ئىتتىپاقداشلىرى ئارىسىدىكى پىكىر ئىختىلاپىنى ئاشكارىلىغان بولۇپ، بۇ ئەھۋال ئۇكرائىنانىڭ رۇسىيە بىلەن بولغان ئۇرۇشتا غەرب ئەللىرىنىڭ قوللىشىنى قولغا كەلتۈرۈشنى تەلەپ قىلىۋاتقان بىر پەيتتە يۈز بەرگەن.

بىلدۈرۈلۈشىچە، ئەنگلىيە باش ۋەزىرى كىر سىتارمېر ۋە باشقا ياۋروپا رەھبەرلىرى تىرامپنىڭ رۇسىيەگە تۇتقان پوزىتسىيەسىنىڭ ئۆزگىرىشىدىن ئەندىشە قىلىۋاتقان بولۇپ، ئۇلار ئۇكرائىناغا بولغان قوللاش ۋە ياردەم بېرىش ۋەدىسىنى قايتا تەكىتلىگەن. زېلېنسكىي نۇرغۇن ئەمەلدارلار بىلەن ئالاقىلىشىپ، ئۇكرائىنانىڭ رۇسىيە قوشۇنلىرىغا قاراتقان قارشىلىق ھەرىكىتىنى تەكىتلىگەن.

نۆۋەتتە كانادا، ئاۋسترالىيە قاتارلىق نۇرغۇن ئىتتىپاقداشلار كۈچلۈك تەرزىدە زېلېنسكىينى قوللايدىغانلىقىنى ئىپادىلىگەن بولسىمۇ، ۋېنگىرىيە باش مىنىستىرى ۋىكتور ئوربان تىرامپ تەرەپتە تۇرغان. ۋەزىيەتنىڭ شۇنداق بولۇشىغا قارىماي، ئۇكرائىنا ئەمەلدارلىرى ۋە ھەربىي خادىملىرى زېلېنسكىينىڭ باشچىلىقىدا رۇسىيەگە بىردەك قارشى ئىكەنلىكىنى ئىپادىلەپ، رۇسىيەگە يول قويىدىغان ھەرقانداق تىنچلىق كېلىشىمىنى رەت قىلىپ كەلمەكتە.

تەييارلىغۇچى: ئابدۇخەبەر رەجەپ