تىرامپ خىتاي ماللىرىغا يەنە %10 باج قويىدىغانلىقىنى ئېلان قىلدى

تىرامپ ھۆكۈمىتى كېلەر ھەپتىدىن تارتىپ خىتاي ماللىرىغا يەنە %10 تاموژنا بېجى قويىدىغانلىقىنى ئېلان قىلغان بولۇپ، بۇنىڭ بىلەن ئومۇمىي قوشۇمچە تاموژنا بېجى %20 كە يەتكەن.

ئامېرىكا ئاۋازىنىڭ خەۋەر قىلىشىچە، تىرامپ ھۆكۈمىتى خىتايغا قاراتقان بېسىمنى يەنىمۇ كۈچەيتكەن بولۇپ، 4-مارتتىن تارتىپ خىتاي ماللىرىغا يەنە %10 تاموژنا بېجى قوشىدىغانلىقىنى ئېلان قىلغان. بۇنىڭ بىلەن خىتايغا قارىتىلغان تاموژنا بېجى 2-ئاينىڭ بېشىدىكى تاموژنا بېجى بىلەن قوشۇلۇپ، %20 كە يەتكەن.

تىرامپ خىتايدىن ئىمپورت قىلىنغان ماللارغا قارىتىلغان %10 باجنىڭ بۇنىڭ ئىلگىرىكى 10% باج ئاساسىدا قوشۇلغانلىقىنى، بۇنىڭ سەۋەبى خىتايدىن كەلگەن زور مىقداردىكى فېنتانىلنىڭ ئامېرىكىغا كىرىشى ئىكەنلىكىنى بىلدۈرگەن.

خىتاي سودا مىنىستىرلىقى ئامېرىكىنى مەسئۇلىيەتنى باشقىلارغا ئارتىش بىلەن تەنقىد قىلىپ، ئۆزىنىڭ قانۇنلىرىنى تەكىتلىگەن ۋە مەسىلىنى دىيالوگ ئارقىلىق ھەل قىلىشقا چاقىرغاندىن باشقا، مەزكۇر باج قارارىنىڭ دۇنيا سودا تەشكىلاتى قائىدىلىرىگە خىلاپ ئىكەنلىكىنى دەۋا قىلغان. خىتاي سودا مىنىستىرلىقى يەنە ئەگەر ئامېرىكا ھازىرقى قىلمىشىنى داۋاملاشتۇرىدىغان بولسا، خىتاينىڭ ئۆز ھوقۇقىنى قوغدايدىغانلىقى ھەققىدە جار سالغان.

مەلۇم بولۇشىچە، 2023-يىلى ئامېرىكىدا ئەپيۈن تۈرىدىكى دورىلارنى ھەددىدىن زىيادە ئىستېمال قىلىش سەۋەبىدىن 74 مىڭدىن ئارتۇق ئادەم ئۆلگەن بولۇپ، خىتاي فېنتانىلنىڭ دەسلەپكى خىمىيەلىك ماددىلىرىنىڭ ئاساسلىق مەنبەسى دەپ قارالغان. زىددىيەتنىڭ كەسكىنلىشىشىگە قارىماي، خىتاي بىلەن ئامېرىكا ئىلگىرى دورا نازارىتى جەھەتتە ھەمكارلاشقانلىقىنى بىلدۈرگەنىدى.

تەييارلىغۇچى: ئابدۇخەبەر رەجەپ