خىتاي ئېلان قىلغان سۈنئىي ئەقىلنىڭ ھەقىقىي تەھدىتى ئاشكارا بولماقتا

خىتاي يېقىندا ئېلان قىلغان سۈنئىي ئەقىلنىڭ ھەقىقىي تەھدىتى بارغانسېرى ئاشكارىلىنىۋاتقان بولۇپ، نۇرغۇن دۆلەتلەر چەكلەشنى ئويلاشقان.

دىپلوماتىيە تورىنىڭ 28-فېۋرال خەۋەر قىلىشىچە، يېقىندا خىتاي شىركىتى DeepSeek ئوچۇق كودلۇق سۈنئىي ئەقىل مودېلى DeepSeek-V3 نى ئېلان قىلغان بولۇپ، بۇ ئەھۋال دۇنيا سۈنئىي ئەقىل تېخنىكىسى ساھەسىدە داۋالغۇش پەيدا قىلغان. تەننەرخى تۆۋەن بۇ مودېلنىڭ ئامېرىكىنىڭ OpenAI ، ChatGPT ۋە Llama گە ئوخشاش يېتەكچى مەھسۇلاتلىرى بىلەن رىقابەتلىشەلەيدىغانلىقى ئىلگىرى سۈرۈلگەن.

DeepSeek-R1 نىڭ ئېلان قىلىنىشى ئامېرىكىنىڭ بۇ ساھەدىكى ئۈستۈنلۈكىگە تېخىمۇ تەھدىت سالغان بولۇپ، ئۇنىڭ تەمىنلىگەن ئىقتىدارلىرى OpenAI نىڭ ئىلغار مودېللىرىغا ئوخشاش بولسىمۇ، باھاسى تۆۋەن بولغان. بۇ ئامېرىكىنىڭ سۈنئىي ئەقىل ساھەسىدىكى يېتەكچىلىك ئورنىنى ساقلاشتا قىيىنچىلىق پەيدا قىلغان.

DeepSeek نىڭ باش كۆتۈرۈشى سۈنئىي ئەقىل مۇسابىقىسىدىكى مەنپەئەتلەرنى كۆرسىتىپ بېرىدىغان بولۇپ، يېتەكچى دۆلەتلەرنىڭ ئالاقىدار تېخنىكا ساھەسىگىلا ئەمەس، يەنە يېرىم ئۆتكۈزگۈچ ساھەسىگىمۇ تەسىر كۆرسىتىدىكەن.

گەرچە ئامېرىكىنىڭ سۈنئىي ئەقىل شىركەتلىرى ئامېرىكا بازىرىغا يېتەكچىلىك قىلىۋاتقان بولسىمۇ، DeepSeek مەھسۇلاتلىرىنىڭ ئوچۇق كودلۇق خاراكتېرى تېخىمۇ تېز تەرەققىياتقا سەۋەب بولۇشى مۇمكىن ئىكەن. بۇ ئەھۋال ئامېرىكا سۈنئىي ئەقىل ساھەسىدىكى ئالاقىدار شەخسلەرنى ئۆز ئىستراتېگىيەلىرىنى قايتا كۆزدىن كەچۈرۈشكە ئۈندەيدىكەن.

ئانالىزدا بىلدۈرۈلۈشىچە، DeepSeek ۋە ئۇنىڭغا ئوخشاش خىتاي مودېللىرىنىڭ تەھدىتىگە تاقابىل تۇرۇش ئۈچۈن، ئامېرىكا ھۆكۈمىتى ئۆزىنىڭ ئوچۇق كودلۇق سۈنئىي ئەقىل سۇپىلىرىنىڭ تەرەققىياتىنى پائال قوللىشى، شۇنداقلا ئۇلارنىڭ دۇنيا مىقياسىدا رىقابەتلەشكۈچى ئىقتىدارىنى كاپالەتلەندۈرۈشى لازىم ئىكەن. بۇنىڭدا سۈنئىي ئەقىل تەرەققىياتىدىكى يېڭىلىقلارنى ئىلگىرى سۈرۈش، ھەر خىل ساھەلەر ئارىسىدىكى ھەمكارلىقنى كۈچەيتىش ۋە كۈچلۈك تېخنىكىلىق ئاساسىي قۇرۇلمىنى قۇرۇش، ئامېرىكىدا ئىشلەپچىقىرىلغان ئۆزەكلەر ۋە پىروگراممىلارغا ئەھمىيەت بېرىش كېرەك ئىكەن.

ئامېرىكا يەنە ئوچۇق كودلۇق سۈنئىي ئەقىل مودېللىرى تەشەببۇسىنى ئىلگىرى سۈرۈش ۋە خىتاينىڭ تەسىرىدىن كەلگەن قىيىنچىلىقلارغا تاقابىل تۇرۇش ئارقىلىق، تېز تەرەققىي قىلىۋاتقان سۈنئىي ئەقىل ساھەسىدىكى يېتەكچىلىك ئورنىنى كاپالەتلەندۈرۈشكە تىرىشىشى كېرەك ئىكەن.

تەييارلىغۇچى: ئابدۇخەبەر رەجەپ