ئامېرىكا-رۇسىيە ھەيئەتلىرى ئىستانبۇلدا مۇزاكىرە يىغىنى ئۆتكۈزدى

ئامېرىكا بىلەن رۇسىيە مۇناسىۋەتلىرىنى نورماللاشتۇرۇش مەسىلىسى ھەققىدە ئىستانبۇلدا مۇزاكىرە يىغىنى ئۆتكۈزدى.

ساباھ گېزىتىنىڭ خەۋەر قىلىشىچە، ئامېرىكا بىلەن رۇسىيەنىڭ ۋەكىللەر ئۆمىكى 27-فېۋرال ئىستانبۇلدىكى ئامېرىكا باش كونسۇلخانىسىدا ئەلچىخانا پائالىيەتلىرىگە مۇناسىۋەتلىك مەسىلىلەرنى مۇزاكىرە قىلىش ئۈچۈن يىغىن ئۆتكۈزگەن.

رۇسىيە تاشقى ئىشلار مىنىستىرى سېرگېي لاۋروف ئالدىنقى كۈنى قىلغان باياناتىدا: «دىپلوماتلىرىمىز ئىلگىرىكى ھۆكۈمەت (جوۋ بايدېن) دەۋرىدە ھەل قىلىنماي كەلگەن سىستېمىلىق مەسىلىلەرنى مۇزاكىرە قىلىدۇ. بۇ مەسىلىلەر ئەلچىخانىلارنىڭ نورمال خىزمەت قىلىشىغا توسقۇنلۇق قىلىۋاتقان نۇقتىلارنى ئۆز ئىچىگە ئالىدۇ. بۇ مۇھىم ئۇچرىشىش ئەتە ئىستانبۇلدا ئۆتكۈزۈلىدۇ» دېگەنىدى.

ئەسلىدە، ئىككى دۆلەت ھەيئەتلىرى ئارىسىدىكى تۇنجى رەسمىي ئۇچرىشىش 18-فېۋرال سەئۇدى ئەرەبىستاننىڭ پايتەختى رىيادتا ئۆتكۈزۈلگەن بولۇپ، ئۇ قېتىمقى يىغىندا ئىككى تەرەپلىك مۇناسىۋەتلەر ۋە ئۇكرائىنا ئۇرۇشىنى ئاخىرلاشتۇرۇش قاتارلىق مەسىلىلەر مۇزاكىرە قىلىنغانىدى.

تەييارلىغۇچى: ئابدۇخەبەر رەجەپ