ئانالىزچىلار: تىرامپنىڭ خىتايغا قاراتقان يېڭى بىر قېتىملىق باستۇرۇشى ئەمدى باشلاندى

ئامېرىكا پىرېزىدېنتى دونالد تىرامپنىڭ خىتايغا قارىتا قاتتىق باياناتلىرى تاموژنا بېجىغا مەركەزلەشكەن بولسىمۇ، ئانالىزچىلار ئۇنىڭ ۋەزىپىگە ئولتۇرغاندىن بۇيان چىقارغان قارارلىرىغا ئاساسەن، خىتايغا قارىتا تېخىمۇ كەڭ دائىرىلىك ئىقتىسادىي چەكلىمىلەرنى ئويلىشىۋاتقانلىقىنى، بۇ چەكلىمىلەر ئامېرىكىنىڭ بۇ مۇھىم سودا شېرىكىدىن ئايرىلىشىنى تېزلىتىشى مۇمكىنلىكىنى بىلدۈرگەن.

نىيۇيورك ۋاقىت گېزىتىنىڭ 27-فېۋرالدىكى ئانالىز خەۋىرىدە قەيت قىلىنىشىچە، ھازىرغىچە تىرامپ ھۆكۈمىتى ئامېرىكا-خىتاي ئوتتۇرىسىدىكى مەبلەغ يۈرۈشۈشىگە بولغان چەكلىمىلەرنى كېڭەيتىشنى ئوتتۇرىغا قويغان. ئۇ تەيىنلىگەن ئەمەلدارلار دۆلەت بىخەتەرلىكىنى تۇتقا قىلىپ، خىتايغا مەبلەغ سېلىشقا ۋە خىتايغا تېخنىكا سېتىشقا تېخىمۇ كۆپ چەكلىمە قويۇشنى تەلەپ قىلىشى مۇمكىن بولۇپ، تىرامپ خىتايدىن كىرگەن مەھسۇلاتلارغا %10 باج قويىدىغانلىقىنى جاكارلىغان. ئۇ بۇنى «بىرىنچى قېتىملىق زەربە» دەپ ئاتىغان.

ئامېرىكىدىكى ئىككى پارتىيەنىڭ ئەمەلدارلىرى يىللاردىن بېرى ئامېرىكا-خىتاي ئىقتىسادىي مۇناسىۋىتىنى تەدرىجىي ھالدا ئازايتقان بولۇپ، نۆۋەتتە تىرامپنىڭ ھەرىكەتلىرى خىتاي بىلەن بولغان بۇ مۇناسىۋەتلەرنى تېخىمۇ قاراتمىلىق ھالدا ئۈزۈشكە تەييار ئىكەنلىكىنى كۆرسىتىپ بېرىدىكەن.

بىر قىسىم تەتقىقاتچىلار تىرامپ ھۆكۈمىتى ئۆتكەن جۈمە ئېلان قىلغان مەبلەغ ئەسلەتمىسىنىڭ «خىتاي بىلەن بولغان سودا مۇناسىۋىتىدىن ئومۇميۈزلۈك ئاجراشتىن ئىبارەت پۈتمىگەن ۋەزىپىنى تاماملاش چاقىرىقى»غا ئوخشايدىغانلىقىنى بىلدۈرۈشكەن.

تەييارلىغۇچى: ئابدۇخەبەر رەجەپ