تەيۋەن ھۆكۈمىتى خىتاي پاراخوتىنى تۇتۇپ قالدى

تەيۋەن ھۆكۈمىتى خىتاينىڭ بىر پاراخوتىنى تۇتۇپ قالغان بولۇپ، دېڭىز ئاستى نۇر كابېلىنى كېسىۋېتىش بىلەن ئەيىبلىگەن.

نىيۇيورك ۋاقىت گېزىتىنىڭ 27-فېۋرال خەۋەر قىلىشىچە، تەيۋەن ھۆكۈمىتى خىتاي پۇقرالىرى ئىشلەيدىغان بىر يۈك پاراخوتىنى تۇتۇپ قالغانلىقىنى ئېلان قىلغان. تەكشۈرگۈچىلەرنىڭ قارىشىچە، بۇ پاراخوت سەيشەنبە كۈنى تەيۋەن ئەتراپىدىكى دېڭىز ئاستى ئالاقە نۇر كابېلىنى كېسىۋەتكەن بولۇشى مۇمكىن ئىكەن. بۇ، يېڭى بىر قېتىملىق نامەلۇم ۋەقە بولۇپ، خىتاي ۋە رۇسىيە باشقا دۆلەتلەرنىڭ نۇر كابېلىنى بۇزۇشنى بىر خىل دېڭىز پاراكەندىچىلىكى ۋاسىتىسى قىلىۋاتقانلىقى سەۋەبلىك، بۇ مەسىلىدە گۇمان قوزغىغان. زىيانغا ئۇچرىغان نۇر كابېلى تەيۋەننى پېڭخۇ تاقىم ئاراللىرىغا باغلايدىغان نۇر كابېلى بولۇپ، پېڭخۇ تاقىم ئاراللىرى تەيۋەن ئارىلىدىن تەخمىنەن 48 كىلومېتىر غەربكە جايلاشقان.

تەيۋەن دېڭىز ساقچى ئىدارىسى نۆۋەتتە بۇ ئەڭ يېڭى ۋەقەنى تەكشۈرۈۋاتقان بولۇپ، نۇر كابېلىنىڭ قەستەن ياكى تاسادىپىي كېسىلگەنلىكى توغرىسىدا تېخى بىرەر يەكۈن چىقارمىغان.

لېكىن دېڭىز ساقچى ئىدارىسى خادىملىرى دەسلەپكى پاكىتلارنىڭ تۇتۇپ قېلىنغان پاراخوتنىڭ بۇ ۋەقەنى پەيدا قىلغانلىقىنى كۆرسىتىدىغانلىقىنى ئېيتقان. دېڭىز ساقچى ئىدارىسى بايانات ئېلان قىلىپ، مەزكۇر كونا پاراخوتنىڭ خىتاي مەبلەغ سالغان ئارقا كۆرۈنۈشكە ئىگە ئىكەنلىكىنى بىلدۈرگەن.

دېڭىز ساقچى ئىدارىسى خادىملىرى تېلېفون زىيارىتىنى قوبۇل قىلىپ، نۇر كابېلىنىڭ ئۈزۈلگەن ئورنىدىكى رادار خاتىرىلىرىنى نەقىل كەلتۈرۈپ: «بىز بۇنىڭ قەستەن بۇزغۇنچىلىق بولۇش ئېھتىماللىقىنى يوققا چىقارمايمىز. بىز پاكىت ئىزدەيمىز. ھازىر خۇلاسە چىقىرىشقا تېخى بالدۇر» دېگەن.

تەييارلىغۇچى: ئابدۇخەبەر رەجەپ