خىتاي مەبلەغ سالغان بەلۇجىستان ئايرودۇرۇمى بىخەتەرلىك سەۋەبلىك قاتناش باشلىيالمىغان

پاكىستاننىڭ بەلۇجىستان ئۆلكىسىدىكى خىتاي مەبلەغ سالغان يېڭى ئايرودۇرۇم تولۇق پۈتكەن بولسىمۇ، بىراق يولۇچى كەمچىل بولۇش ۋە بىخەتەرلىك سەۋەبلىك قاتناش باشلىيالمىغان.

CNN تۈرك خەۋەر تورىنىڭ 25-فېۋرال خەۋەر قىلىشىچە، پاكىستاننىڭ يېڭى گىۋادار خەلقئارا ئايرودۇرۇمى خىتاينىڭ 240 مىليون دوللار مەبلىغى بىلەن قۇرۇلغان بولۇپ، 2024-يىلى 10-ئايدا پۈتكەن بولسىمۇ، تېخىچە قاتناش باشلانمىغان.

بۇ ئايرودۇرۇم نامرات بەلۇجىستان ئۆلكىسىگە جايلاشقان بولۇپ، يەرلىك ئاھالىنىڭ ساياھەت قىلىش تاللىشىدىن كۆرە، خىتاي پۇقرالىرىنىڭ بىخەتەر رايونغا ئۆتۈش يولى سۈپىتىدە قوللىنىش ئۈچۈن سېلىنغان. گەرچە پىلان بويىچە ئايرودۇرۇمنىڭ يىللىق يولۇچى توشۇش مىقدارى 400 مىڭ كىشى بولسىمۇ، ئەمما پەقەت 90 مىڭ ئاھالىسى بار ھەمدە ئېلېكتىر، پاكىز سۇ مەنبەسى قاتارلىق ئۇل ئەسلىھەلەر كەمچىل بولغان بىر رايون ئۈچۈن ئېيتقاندا، بۇ يىللىق پىلاننىڭ ھېچقانداق ئەھمىيىتى يوق ئىكەن.

بىلدۈرۈلۈشىچە، شەرقىي تۈركىستاندىن بەلۇجىستان تۇتاشقان خىتاي-پاكىستان ئىقتىسادىي كارىدورىدىكى خىزمەت پۇرسەتلىرىنىڭ كەملىكى ۋە رايوندىكى خەلقنىڭ ھۆكۈمەت تەرىپىدىن باستۇرۇلۇشى سەۋەبلىك، خەلقنىڭ ھۆكۈمەتكە قارشى نارازىلىق كەيپىياتى داۋاملىق كۈچەيگەن. بۇ ئۇزۇن مۇددەت مەۋجۇت بولۇپ كەلگەن قوراللىق قارشىلىق ھەرىكەتلىرىگە سەۋەب بولغان. پاكىستان ھۆكۈمىتى رايوندا بىخەتەرلىك تەدبىرلىرىنى كۈچەيتىش بىلەن بىرگە، يەرلىك خەلقنىڭ ئېھتىياجلىرىنى قاندۇرۇش مەسىلىسىگە دۇچ كەلگەن.

بەلۇجىستان ئازادلىق ئارمىيەسى يېقىنقى يىللاردىن بېرى خىتاينىڭ رايوندىكى تۆمۈر يولى قۇرۇلۇشىغا قارشى ھەرىكەت قىلىپ، نۇرغۇنلىغان خىتاي ئىشچىلىرى ۋە ئىنژېنېرلىرىنى ئۆلتۈرگەنىدى.

بەلۇجىستان ئازادلىق ئارمىيەسى تەبىئىي بايلىققا باي بولغان بەلۇجىستان ئۆلكىسىدىكى بارلىق قوراللىق تەشكىلاتلار ئىچىدىكى ئەڭ كۈچلۈك ۋە ئەڭ ۋەيران قىلغۇچ كۈچكە ئىگە تەشكىلات بولۇپ، يېقىندا مەزكۇر رايوندا خىتايغا قارشى يۈز بەرگەن ھۇجۇملارنىڭ ھەممىسىگە دېگۈدەك بەلۇجىستان ئازادلىق ئارمىيەسى مەسئۇل ئىكەنلىكىنى ئېلان قىلغان.

تەييارلىغۇچى: ئابدۇخەبەر رەجەپ