شى جىنپىڭ پۇتىن بىلەن بولغان چەكسىز ھەمكارلىقىنى تەكىتلىدى

شى جىنپىڭ ئۇكرائىنا ئۇرۇشىنىڭ ئۈچ يىللىق خاتىرە كۈنىدە ئۆتكۈزۈلگەن تېلېفون سۆھبىتىدە، پۇتىن بىلەن بولغان چەكسىز تەرىقىدىكى ھەمكارلىقىنى قايتا مۇئەييەنلەشتۈرگەن.

NBC نىڭ خەۋەر قىلىشىچە، خىتاي رەئىسى شى جىنپىڭ دۈشەنبە كۈنى رۇسىيە پىرېزىدېنتى ۋىلادىمىر پۇتىن بىلەن ئۆتكۈزگەن تېلېفون سۆھبىتىدە ئىككى تەرەپنىڭ چەكسىز تەرىقىدىكى ھەمكارلىقىنى يەنە بىر قېتىم تەكىتلىگەن بولۇپ، بۇ خەۋەرنى خىتاينىڭ رەسمىي ئاخبارات ۋاسىتىلىرى ئالاھىدە خەۋەر قىلغان. بۇ سۆھبەت رۇسىيەنىڭ ئۇكرائىناغا ئومۇميۈزلۈك تاجاۋۇز قىلغانلىقىنىڭ ئۈچ يىللىق خاتىرە كۈنىگە توغرا كەلگەن.

ئىككى تەرەپ ئامېرىكا پىرېزىدېنتى دونالد تىرامپ ئۇكرائىنا ئۇرۇشىنى ئاخىرلاشتۇرۇش كېلىشىمىنى تېزلىكتە ۋۇجۇدقا كەلتۈرۈش ئۈچۈن بېسىم قىلىۋاتقان مەزگىلدە سۆھبەتلەشكەن بولۇپ، ئامېرىكا خىتاي بىلەن بولغان ئىقتىسادىي رىقابەت مەسىلىسىدە دىققىتىنى خىتايغا مەركەزلەشتۈرۈش ئۈچۈن، يېقىندىن بېرى شى جىنپىڭ بىلەن پۇتىن ئوتتۇرىسىدا شەكىللەنگەن دوستلۇق ۋە ھەمكارلىقنى پارچىلاشقا تىرىشقان.

بۇ قېتىمقى سۆھبەت بۇنداق ئېھتىماللىقنى يوققا چىقىرىش ئۈچۈن ئەمەلگە ئاشقاندەك كۆرۈنگەن بولۇپ، پۇتىن بىلەن شى جىنپىڭ ئىتتىپاقداشلىقنىڭ ئۇزۇن مۇددەتلىك ۋە مۇقىم بولۇشىنى تەكىتلەپ، ئىچكى مۇناسىۋەتنىڭ ھەرقانداق ئۈچىنچى تەرەپنىڭ تەسىرىگە ئۇچرىمايدىغانلىقىنى بىلدۈرۈشكەن.

خىتاي ئاخبارات ۋاسىتىلىرىدا ئېلان قىلىنغان رەسمىي خەۋەرلەردە ئېيتىلىشىچە، شى جىنپىڭ: «خىتاي-رۇسىيە مۇناسىۋىتى كۈچلۈك ئىچكى قوزغاتقۇچ كۈچكە ۋە ئالاھىدە ئىستراتېگىيەلىك قىممەتكە ئىگە بولۇپ، ھەرقانداق ئۈچىنچى تەرەپكە قارىتىلمىغان، شۇنداقلا ھەرقانداق ئۈچىنچى تەرەپنىڭ تەسىرىگە ئۇچرىمايدۇ. خىتاي بىلەن رۇسىيەنىڭ تەرەققىيات ئىستراتېگىيەسى ۋە دىپلوماتىيە سىياسىتى ئۇزۇن مۇددەتلىك بولۇپ، ئىككى دۆلەت ئايرىلماس ياخشى قوشنىلار» دېگەنلەرنى دەۋا قىلغان.

خەۋەردە قەيت قىلىنىشىچە، نۆۋەتتە رۇسىيە شىمالىي ئاتلانتىك ئەھدى تەشكىلاتى قوللىغان ئۇكرائىنا قوشۇنلىرى بىلەن جەڭ قىلىۋاتقان، خىتاي بولسا ئامېرىكىنىڭ بىرلەشمە ھەرىكىتى ئاستىدا ئىقتىسادىي بېسىمغا دۇچ كېلىۋاتقان بولۇپ، ئىككى تەرەپ بارغانسېرى گېئوپولىتىكىلىق ئورتاقلىقنى تېپىشقا باشلىغان. يېقىنقى يىللاردا شى جىنپىڭ پۇتىنغا ئىككى دۆلەتنىڭ بىر ئەسىردە كۆرۈلمىگەن ئۆزگىرىشنى ئىلگىرى سۈرۈش پۇرسىتىگە ئىگە ئىكەنلىكىنى ئېيتقان بولۇپ، نۇرغۇن تەھلىلچىلەر بۇنى ئامېرىكا باشلامچىلىقىدىكى دۇنيا تەرتىپىگە قارشى چىقىش ئۈچۈن دېيىلگەن سۆزلەر، دەپ قارىغان.

مەلۇم بولۇشىچە، پۇتىن 2022-يىلى 2-ئايدا ئۇكرائىناغا ئون مىڭلىغان قوشۇن ئەۋەتىشتىن ئىلگىرى، خىتاي بىلەن رۇسىيەنىڭ چەكسىز ئىستراتېگىيەلىك ھەمكارلىق ئورناتقانلىقىنى جاكارلىغان بولۇپ، ئۆتكەن ئون يىل ئىچىدە شى جىنپىڭ پۇتىن بىلەن 40 نەچچە قېتىم كۆرۈشكەن.

تەييارلىغۇچى: ئابدۇخەبەر رەجەپ