ياپونىيە بىلەن فىلىپپىن مۇداپىئە ھەمكارلىقىنى كۈچەيتىشكە كېلىشتى

ياپونىيە بىلەن فىلىپپىن ھىندى-تىنچ ئوكيان رايونىدىكى بىخەتەرلىك ۋەزىيىتىنىڭ ناچارلىشىشىغا تاقابىل تۇرۇش ئۈچۈن، مۇداپىئە ھەمكارلىقىنى كۈچەيتىشكە كېلىشتى.

جەنۇبىي خىتاي سەھەر پوچتىسى گېزىتىنىڭ 24-فېۋرال خەۋەر قىلىشىچە، ياپونىيە ۋە فىلىپپىن ھىندى-تىنچ ئوكيان رايونىدىكى بىخەتەرلىك ۋەزىيىتىنىڭ ناچارلىشىشىغا تاقابىل تۇرۇش ئۈچۈن مۇداپىئە ھەمكارلىقىنى كۈچەيتكەن بولۇپ، ياپونىيە مۇداپىئە ۋەزىرى گېن ناكاتانى مانىلادا فىلىپپىن دۆلەت مۇداپىئە مىنىستىرى گىلبېرتو تېئودورو بىلەن كۆرۈشكەن.

كۆرۈشۈشتە ئىككى مىنىستىر رايون بىخەتەرلىكى مەسىلىلىرىنى، بولۇپمۇ شەرقىي دېڭىز ۋە جەنۇبىي دېڭىزدىكى ۋەزىيەتنى مۇھاكىمە قىلغان ھەمدە ھەربىي ساھەدىكى ئالماشتۇرۇش ۋە ئالاقىنى چوڭقۇرلاشتۇرۇش، يۇقىرى دەرىجىلىك ئىستراتېگىيەلىك دىيالوگ ئورنىتىش ۋە ئۇچۇر ئالماشتۇرۇشنى ياخشىلاشقا كېلىشكەن.

خەۋەردە قەيت قىلىنىشىچە، ئىككى تەرەپ خىتاينىڭ ناتوغرا ھەرىكەتلىرىدىن ئورتاق ئەندىشە قىلغانلىقتىن، ھەمكارلىقى تېخىمۇ كۈچەيگەن. يېقىندا ئىككى دۆلەت بىر-بىرىنىڭ زېمىنىدا ھەربىي قىسىم ئورۇنلاشتۇرۇشقا يول قويىدىغان ھەربىي كېلىشىم ئىمزالىغان. ياپونىيە يەنە فىلىپپىننى دېڭىز بويى رادار سىستېمىسى ۋە كۆزىتىش پاراخوتى قاتارلىق ھەربىي ئۈسكۈنىلەر بىلەن تەمىنلەپ ياردەم قىلغان.

تەييارلىغۇچى: ئابدۇخەبەر رەجەپ