ئامېرىكا ئەلچىسى: ئىسرائىلىيە بىلەن ھاماسنىڭ ئىككىنچى باسقۇچلۇق كېلىشىمىنى كۈتمەكتىمىز

ئامېرىكا ئوتتۇرا شەرق ئىشلىرى ئالاھىدە ئەلچىسى سىتېۋېن ۋىتكوف ئامېرىكىنىڭ ئىسرائىلىيە بىلەن ھاماسنىڭ پىلانلانغان ۋاقىتتا ئىككىنچى باسقۇچلۇق ئۇرۇش توختىتىش كېلىشىمى تۈزۈشىنى كۈتۈۋاتقانلىقىنى بىلدۈردى.

ئامېرىكا ئاۋازىنىڭ خەۋەر قىلىشىچە، ۋىتكوف 23-فېۋرال CNN قانىلىنىڭ زىيارىتىنى قوبۇل قىلىپ، نېتانياھۇنىڭ پەلەستىنلىك تۇتقۇنلارنى قويۇپ بېرىشنى كېچىكتۈرۈش مەسىلىسى ھەققىدە سورالغان جاۋاب بەرگەن ۋە ئىسرائىلىيە-ھاماس ئىككىنچى باسقۇچلۇق ئۇرۇش توختىتىش كېلىشىمى ھەققىدە توختىلىپ: «بىز بىرىنچى باسقۇچلۇق ئۇرۇش توختىتىش كېلىشىمىنى ئۇزارتىشىمىز كېرەك» دېگەن.

رويتېرس ئاگېنتلىقىنىڭ نەقىل كەلتۈرۈپ خەۋەر قىلىشىچە، ۋىتكوف يەنە :«مەن بۇ ھەپتە، بەلكىم چارشەنبە كۈنى رايونغا بېرىپ، بۇ ھەقتە سۆھبەتلىشىمەن» دېگەن.

بىلدۈرۈلۈشىچە، ھاماس ئەزالىرى شەنبە كۈنى يەنە ئالتە ئىسرائىلىيەلىك ئەسىرىنى قويۇپ بەرگەن بولۇپ، بۇ بىرىنچى باسقۇچلۇق ئۇرۇش توختىتىش كېلىشىمى بويىچە ھاماسنىڭ ھايات قالغان ئىسرائىلىيەلىك ئەسىرلەرنى ئاخىرقى قېتىم قويۇپ بېرىشى ھېسابلىنىدىكەن. بۇنىڭغا قارىتا ئىسرائىلىيەمۇ شۇ كۈنى 600 دىن ئارتۇق پەلەستىنلىك مەھبۇسنى قويۇپ بېرىشى كېرەك ئىكەن.

ئەمما ئىسرائىلىيە باش مىنىستىرى بۇنيامىن نېتانياھۇ ھاماسنىڭ ئەسىرلەرنى قويۇپ بېرىشتىن بۇرۇن ئۇلارنى كۆپچىلىككە كۆرسىتىپ «خورلىغانلىقى»نى ۋە بەزى ئەسىرلەرنى مەجبۇرىي سۆزلەتكەنلىكىنى باھانە قىلىپ، پەلەستىنلىك تۇتقۇنلارنى قويۇپ بېرىشنى ۋاقتىنچە توختىتىش بۇيرۇقى چۈشۈرگەن.

ھاماس يەكشەنبە كۈنى بايانات ئېلان قىلىپ، ئىسرائىلىيەنىڭ پەلەستىنلىك تۇتقۇنلارنى قويۇپ بېرىشنى كېچىكتۈرۈش قارارىنى ئەيىبلىگەن ۋە ئىسرائىلىيەنىڭ ئەسىر ئۆتكۈزۈپ بېرىش مۇراسىمىنى «ئەسىرلەرنى خورلاش» دەپ ئەيىبلىشىنىڭ ئاساسسىز ئىكەنلىكىنى، بۇ پەقەت غەززە ئۇرۇش توختىتىش كېلىشىمىدىكى مەجبۇرىيەتتىن قېچىشنىڭ باھانىسى ئىكەنلىكىنى بىلدۈرگەن.

نېتانياھۇ ئىشخانىسى يەكشەنبە كۈنى تاڭ سەھەردە بايانات ئېلان قىلىپ، ئىسرائىلىيەنىڭ كېيىنكى تۈركۈمدە ئەسىرلەرنى خورلىمىغان ھالدا قويۇپ بېرىشكە كاپالەت قىلىنغاندىن كېيىن، ئاندىن 620 پەلەستىن تۇتقۇننى قويۇپ بېرىدىغانلىقىنى بىلدۈرگەن.

تەييارلىغۇچى: ئابدۇخەبەر رەجەپ