تۈركىيەنىڭ مۇئاۋىن سودا مىنىستىرى شەرقىي تۈركىستاننى زىيارەت قىلغان

تۈركىيەنىڭ مۇئاۋىن سودا مىنىستىرى مەھمۇد گۈرجان باشچىلىقىدىكى ھەيئەت 21-فېۋرال شەرقىي تۈركىستاننى زىيارەت قىلغان بولۇپ، بۇ جەرياندا ئاتالمىش «ئۇيغۇر ئاپتونوم رايونلۇق پارتىيە كومىتېتى»نىڭ سېكرېتارى ما شىڭرۈي، قورچاق رەئىس ئەركىن تۇنىياز بىلەن كۆرۈشكەن.

تەڭرىتاغ تورىنىڭ خەۋەر قىلىشىچە، كۆرۈشۈشتە ما شىڭرۈي يېقىنقى يىللاردىن بۇيان تۈركىيە بىلەن بولغان يەرلىكلەر ئارا دوستانە مۇناسىۋەتنىڭ سىجىل تەرەققىي قىلغانلىقىنى، ئىككى تەرەپنىڭ ئالاقىسى كۈنسېرى كۆپىيىپ، ئىمپورت-ئېكسپورت ئومۇمىي سوممىسىنىڭ كۆرۈنەرلىك ئاشقانلىقىنى، ئىككى تەرەپنىڭ «بىر بەلباغ، بىر يول»نى ئورتاق بەرپا قىلىش تەشەببۇسى بىلەن تۈركىيەنىڭ «ئوتتۇرا كارىدور» پىلانىنى ئۇدۇللاشتۇرۇشنى ئالغا سىلجىتىش، نۇقتىلىق كۆرگەزمە-يەرمەنكىلەردە ھەمتۈرتكە بولۇش ۋە ئىقتىساد-سودا ھەيئەتلىرى ئۆزئارا زىيارەتتە بولۇش قاتارلىق پائالىيەتلىرىنى كېڭەيتكەنلىكىنى دەۋا قىلغان.

خەۋەردە يەنە ما شىڭرۈينىڭ تۈركىيە ھەيئىتى بىلەن ئاتالمىش «ئۇيغۇر ئاپتونوم رايونى»نىڭ تارىخىنى توغرا تونۇش، ھەمكارلىشىپ تېررورىزمغا زەربە بېرىش قاتارلىق مەسىلىلەر توغرىسىدا پىكىر ئالماشتۇرغانلىقى بىلدۈرۈلگەن.

تەڭرىتاغ تورىنىڭ مەزكۇر خەۋىرىدە قەيت قىلىنىشىچە، مەھمۇد گۈرجان سۆھبەت جەريانىدا يېقىنقى يىللاردىن بۇيان تۈركىيە بىلەن خىتاينىڭ ھەرقايسى ساھەلەردىكى ھەمكارلىق نەتىجىلىرىنىڭ كۆرۈنەرلىك بولغانلىقىنى، تۈركىيەنىڭ شەرقىي تۈركىستان بىلەن بولغان ئىقتىساد-سودا ھەمكارلىقىنىڭمۇ تېخىمۇ زور ئېشىش يوشۇرۇن كۈچىنى جارى قىلدۇرغانلىقىنى، بۇنىڭدىن كېيىنكى قەدەمدە بىۋاسىتە ئاۋىياتسىيە لىنىيەسىنى كۆپەيتىشنى، كۆرگەزمە-يەرمەنكە، ئىقتىسادىي ھەمكارلىق قاتارلىق خىزمەتلەردە تېخىمۇ زور ئىلگىرىلەشلەرنى قولغا كەلتۈرۈشنى، ئىقتىساد-سودا ھەمكارلىق مۇناسىۋىتىنىڭ تېخىمۇ يۇقىرى سەۋىيەگە كۆتۈرۈلۈشىنى ئۈمىد قىلىدىغانلىقىنى بىلدۈرگەن.

كۆرۈشۈشتە تۈركىيەنىڭ خىتايدا تۇرۇشلۇق باش ئەلچىسى ئىسمائىل ھاككى مۇسامۇ سۆز قىلىپ، ھەمكارلىق بوشلۇقىنى كېڭەيتىش ئۈچۈن، تۈركىيە بىلەن خىتاينىڭ ئۈنۈملۈك تىرىشچانلىق كۆرسەتكەنلىكىنى، تۈركىيەنىڭ قەتئىي تۈردە تېررورچى كۈچلەرگە قارشى تۇرۇپ ۋە زەربە بېرىپ، ئىككى دۆلەت مۇناسىۋىتىنى چوڭقۇرلاشتۇرىدىغانلىقىنى، ئىككى تەرەپ ھەمكارلىقنى كۈچەيتىش ئۈچۈن ياخشى شارائىت ھازىرلايدىغانلىقىنى بىلدۈرگەن.

تەييارلىغۇچى: ئابدۇخەبەر رەجەپ