خىتاي ئەلچىسى سۇرىيەنىڭ يېڭى رەھبىرى بىلەن كۆرۈشتى

خىتاي ئالاھىدە ئەلچىسى سۇرىيەنىڭ يېڭى رەھبىرى ئەھمەد شەرئى بىلەن كۆرۈشكەن بولۇپ، بۇ كۆرۈشۈش ئەسەد ئاغدۇرۇلغاندىن كېيىنكى تۇنجى قېتىم خىتاينىڭ سۇرىيە يېڭى رەھبىرى بىلەن ئىككى تەرەپلىك ئۇچرىشىشى ئىكەن.

جەنۇبىي خىتاي سەھەر پوچتىسى گېزىتىنىڭ 22-فېۋرال خەۋەر قىلىشىچە، خىتاي بەششار ئەسەدنى ئىزچىل قوللىغان بولۇپ، ئۆتكەن يىلى دېكابىر ئېيىدا ئەسەد ھاكىمىيىتى ئاغدۇرۇلغاندىن كېيىن، دەمەشقتىكى خىتاي ئەلچىخانىسى بۇلاڭ-تالاڭ قىلىنغان.

سۇرىيە دۆلەت ئاخبارات ۋاسىتىلىرىنىڭ جۈمە كۈنى خەۋەر قىلىشىچە، سۇرىيەنىڭ يېڭى پىرېزىدېنتى ئەھمەد شەرئى ئۆتكەن يىلى دېكابىر ئېيىدا بەششار ئەسەد ئاغدۇرۇلغاندىن كېيىنكى تۇنجى قېتىم ئاشكارا ھالدا خىتاي ئەلچىسى بىلەن ئىككى تەرەپلىك ئۇچراشقان.

بىلدۈرۈلۈشىچە، ئەسەدنى قوللىغان خىتاي ئەسەد ھاكىمىيىتى يىقىلغاندىن كېيىن، دەمەشقتىكى خىتاي ئەلچىخانىسى نامەلۇم كىشىلەر تەرىپىدىن بۇلاڭ-تالاڭ قىلىنغان. سۇرىيەنىڭ يېڭى ھۆكۈمىتى يەنە چەت ئەللىك مۇجاھىدلارنى، جۈملىدىن خىتاينىڭ زىيانكەشلىكى سەۋەبلىك چەت ئەلگە قاچقان ئۇيغۇرلارنىمۇ سۇرىيە مۇداپىئە قىسىملىرى دائىرىسىگە كىرگۈزگەن.

سۇرىيە ئەرەب خەۋەر ئاگېنتلىقى (SANA) ئەھمەد شەرئنىڭ خىتاي ئالاھىدە ئەلچىسى شى خوڭۋېي بىلەن كۆرۈشكەنلىكىنى خەۋەر قىلغان، ئەمما مۇزاكىرە قىلىنغان مەزمۇنلار ھەققىدە تەپسىلىي مەلۇمات بەرمىگەن.

مەلۇم بولۇشىچە، خىتاي رەئىسى شى جىنپىڭ ئەسەدنى تاشقى كۈچلەرنىڭ ئارىلىشىشىغا قارشى قوللايدىغانلىقىغا ۋەدە بەرگەن بولۇپ، 2011-يىلى سۇرىيە ئىچكى ئۇرۇشى باشلانغاندىن بۇيان، ئۇزۇن مۇددەتلىك خەلقئارا جەمئىيەتنىڭ ئېمبارگو يۈرگۈزۈشى سەۋەبلىك چەتكە قېقىلغان سۇرىيە ئەمەلدارلىرى 2023-يىلى خىتاينى زىيارەت قىلغان. بۇ جەرياندا شى جىنپىڭ يەنە ئەسەد ۋە ئايالىنى رەسمىي مۇراسىم بىلەن كۈتۈۋېلىپ، مېھماندوستلۇق كۆرسىتىپ، خەلقئارادا ئاز ئۇچرايدىغان پۇرسەت يارىتىپ بەرگەن.

تەييارلىغۇچى: ئابدۇخەبەر رەجەپ