مۇھاجىرەتتىكى ئۇيغۇرلار ئانا تىل كۈنىنى ئالاھىدە خاتىرىلىدى

خىتاي شەرقىي تۈركىستاندا ئۇيغۇر قاتارلىق تۈركىي خەلقلەرنىڭ تىل-يېزىقىنى چەكلەپ، خىتايچىنى مەجبۇرىي تېڭىۋاتقان بىر ۋەزىيەتتە، دۇنيانىڭ ھەرقايسى جايلىرىدا ياشاۋاتقان ئۇيغۇرلار، ئانا تىل مەكتەپلىرى دۇنيا ئانا تىل كۈنىنى ھەرخىل ئۇسۇللار بىلەن ئالاھىدە خاتىرىلىدى.

جۈملىدىن تاڭنۇرى تەلىم-تەربىيە مەركىزى 22-فېۋرال ئىستانبۇلنىڭ فاتىھ رايونىدا ئانا تىل كۈنىنى خاتىرىلەش پائالىيىتى ئۆتكۈزدى. پائالىيەتتە ئوقۇغۇچىلار ئانا تىل، ۋەتەن، مىللەت سۆيگۈسىگە تويۇنغان تۈرلۈك نومۇرلارنى ئىشتىراك قىلغۇچىلارنىڭ ھۇزۇرىغا سۇندى. پائالىيەتتە يەنە تاڭنۇرى تەلىم-تەربىيە مەركىزىدىكى ئوقۇتقۇچىلارنىڭ خىزمەتلىرى تەقدىرلىنىپ، ھەدىيە تەقدىم قىلىندى.

ئۇندىن باشقا سۇتۇق بۇغراخان تەلىم-تەربىيە مەركىزىنىڭ كونيا شۆبىسىمۇ 21-فېۋرال كونيادا دۇنيا ئانا تىل كۈنىنى خاتىرىلەش پائالىيىتى ئۆتكۈزدى. پائالىيەتتە ئۇيغۇر ئۆسمۈرلىرى رەڭگارەڭ نومۇرلىرى بىلەن ئانا تىل سۆيگۈسىنى ئىپادىلىدى.