خىتاي ئىستىقلال تېلېۋىزىيەسىنىڭ تور بېكەتلىرىگە تور ھۇجۇمىنى كۈچەيتمەكتە

يىللاردىن بېرى خىتاينىڭ شەرقىي تۈركىستاندىكى ئىشغالىيىتى ۋە جىنايەتلىرىنى خەلقئاراغا پاش قىلىشتا ئۈزلۈكسىز خىزمەت قىلىپ، ئۇيغۇر، تۈرك، ئەرەب، ئىنگلىز تىللىرىدا خەۋەر ۋە سۆھبەت پىروگراممىلىرىنى سۇنۇپ كېلىۋاتقان ئىستىقلال تېلېۋىزىيەسىنىڭ تور بېكەتلىرى خىتاي خاككېرلىرىنىڭ ئىزچىل ھۇجۇمىغا ئۇچراپ كەلدى ۋە يېقىنقى مەزگىللەردە بۇ ھۇجۇم تېخىمۇ كۈچەيمەكتە.

يېقىنقى بىر-ئىككى ھەپتىدىن بېرى ئىستىقلال تېلېۋىزىيەسىنىڭ تۆت تىلدا خەۋەر تارقىتىۋاتقان تور بېكەتلىرىدە باشقۇرۇش سۇپىسى ئېچىلماسلىق، رەسىم يۈكلەنمەسلىك، خەۋەر قويغىلى بولماسلىق قاتارلىق بىر قاتار مەسىلىلەر كۆرۈلگەن بولۇپ، تور بېكەتلەرنى بىخەتەرلىك مۇلازىمىتى بىلەن تەمىنلەپ كېلىۋاتقان شىركەتنىڭ بىلدۈرۈشىچە، خىتاي خاككېرلىرى يېقىندىن بېرى ئىستىقلالنىڭ تور بېكەتلىرىگە قاتتىق ھۇجۇم قوزغىغان.

ئىستىقلال تېلېۋىزىيەسىنىڭ تور بېكەتلىرى ئىزچىل تۈردە خىتاي خاككېرلىرىنىڭ ھۇجۇم نىشانى بولۇپ كەلمەكتە. جۈملىدىن 2021-يىلى ئۈچىنچى ئايدا خىتاي خاككېرلىرىنىڭ ھۇجۇمى سەۋەبلىك، تور بېكەتلەر بىر ھەپتىگە يېقىن پالەچ ھالغا چۈشۈپ قالغانىدى. شىركەتنىڭ بىخەتەرلىككە مەسئۇل خادىملىرى ئىستىقلال تېلېۋىزىيەسىنىڭ تور بېكەتلىرىگە قارىتىلغان ھۇجۇم سەۋەبلىك، مەزكۇر شىركەت مۇلازىمەت بىلەن تەمىنلەۋاتقان باشقا تور بېكەتلەرنىڭمۇ تەسىرگە ئۇچرىغانلىقىنى ئۇقتۇرغانىدى.

2024-يىلى 10-ئايدا شەرقىي تۈركىستاندىن تۈركىيەگە ھىجرەت قىلىپ پاناھلانغان ئۇيغۇرلار ۋە تەشكىلاتلار ھەققىدە ئۇچۇر توپلاپ، خىتاي ئىستىخبارات ئورگىنىغا يەتكۈزگەنلىكى سەۋەبلىك قولغا ئېلىنغان يەتتە جىنايەت گۇماندار ئىچىدىن جاۋابكار سادىق مەمەتئەزىزغا ئىستىقلال تېلېۋىزىيە ھەققىدىكى مەلۇماتلارنى قەرەللىك يەتكۈزۈش ۋەزىپىسى تاپشۇرۇلغان.

خىتاي ئىستىقلال تېلېۋىزىيەسىنى چەكلەش ۋە بۇزغۇنچىلىققا ئۇچرىتىش ئۈچۈن، تۈرلۈك ئۇسۇللارنى قوللىنىپ كەلمەكتە. جۈملىدىن خىتاي تاشقى ئىشلار مىنىستىرلىقى كۆپ قېتىم تۈركىيە ھۆكۈمىتىگە شىكايەت قىلىش ۋە تۈركىيە سوتىغا ئەرز قىلىش نەتىجىسىدە، ئىستىقلال تېلېۋىزىيەسىنىڭ ئورگان تور بېكىتى بىر قانچە قېتىم تاقىۋېتىلگەنىدى. 2022-يىلى خىتاي تاشقى ئىشلار مىنىستىرلىقى باياناتچىسى ئىستىقلال تېلېۋىزىيەسىگە قارىتا تۆھمەت خاراكتېرلىك بايانلارنى ئوتتۇرىغا تاشلىغانىدى. ھەتتا خىتاينىڭ تۈركىيە ھۆكۈمىتىدىن ئىستىقلال تېلېۋىزىيەسىنى چەكلەشنى تەلەپ قىلىپ، كۆپ قېتىم شىكايەتنامە سۇنغانلىقى مەلۇم بولغانىدى.

ئىستىقلال تېلېۋىزىيەسىنىڭ خەۋەر تور بېكەتلىرى خىتاينىڭ شەرقىي تۈركىستاندا ئىجرا قىلىۋاتقان جازا لاگېرىغا قاماش، مەجبۇرىي تۇغماس قىلىش، خىتاي ئۆلكىلىرىگە سۈرگۈن قىلىش، مەجبۇرىي ئەمگەككە سېلىش، ئۇيغۇر ئۆسمۈرلىرىنى ئاسسىمىلياتسىيە قىلىش قاتارلىق ساناپ تۈگەتكۈسىز ئىرقىي قىرغىنچىلىق جىنايەتلىرىنى خەلقئاراغا پاش قىلىپ كېلىۋاتقان بىر ئاخبارات ئورگىنى بولۇش سۈپىتى بىلەن، ئىزچىل تەرىقىدە خىتاينىڭ ھۇجۇم نىشانى بولۇپ كەلمەكتە.

تەييارلىغۇچى: ئابدۇخەبەر رەجەپ