خىتاي ئوتتۇرا شەرقنىڭ قورال-ياراغ بازىرىنى ئىگىلەشكە ئۇرۇنماقتا

خىتاي ئوتتۇرا شەرقتە J-35 تىپلىق ئۇرۇش ئايروپىلانىنى كۆز-كۆز قىلىشقا باشلىغان بولۇپ، ئوتتۇرا شەرقتىكى قورال-ياراغ بازىرىنى ئىگىلەشكە تىرىشقان.

جەنۇبىي خىتاي سەھەر گېزىتىنىڭ 21-فېۋرال خەۋەر قىلىشىچە، خىتاي ئەرەب بىرلەشمە خەلىپىلىكىدە ئۆتكۈزۈلگەن خەلقئارا مۇداپىئە كۆرگەزمىسىدە (IDEX) پاراخوتقا قونالايدىغان كۆرۈنمەس J-35 تىپلىق ئۇرۇش ئايروپىلانىنى كۆرگەزمە قىلغان.

بىلدۈرۈلۈشىچە، خىتاينىڭ J-35 تىپلىق ئايروپىلانى ئامېرىكىنىڭ F-35 تىپلىق ئايروپىلانىغا ئوخشاپ كېتىدىغان بولۇپ، رايوندىكى بىر قىسىم خېرىدارلارنىڭ دىققىتىنى تارتقان. خىتاي ئاۋىياتسىيە تېخنىكىسى خەلقئارا شىركىتى يەنە J-10C نىڭ ئېكسپورت نۇسخىسى بولغان J-10CE نى تەشۋىق قىلىشقا باشلىغان. نۆۋەتتە خىتاينىڭ بۇ ئايروپىلانى پاكىستان ۋە مىسىرغا سېتىلغان بولۇپ، ئەرەب بىرلەشكەن خەلىپىلىكى ۋە باشقا ئوتتۇرا شەرق دۆلەتلىرى ئىلغار ئۇرۇش ئايروپىلانلىرىنى سېتىۋېلىش ئۈچۈن ئىزدەنمەكتىكەن. ئەمما گېئوپولىتىكىلىق جىددىيلىك سەۋەبىدىن ئامېرىكىنىڭ قورال سېتىشى كېچىكتۈرۈلگەن.

تەھلىلچىلەرنىڭ قارىشىچە، بەزى دۆلەتلەر غەرب تەمىنلىگۈچىلىرىگە بولغان بېقىنىشنى ئازايتىش ئۈچۈن، خىتاي ئايروپىلانلىرىنى تاللىشى مۇمكىن ئىكەن. بىراق خىتاي ھەربىي ئۈسكۈنىلىرىنىڭ سۈپىتى ۋە ئىشەنچلىك دەرىجىسى ھەققىدە ئەندىشىلەر مەۋجۇت ئىكەن.

تەييارلىغۇچى: ئابدۇخەبەر رەجەپ