ئامېرىكا رۇسىيەنى «تاجاۋۇزچى» دەپ ئاتاشقا قارشى چىقتى

ئامېرىكا يەتتە دۆلەت گۇرۇھىنىڭ رۇسىيە-ئۇكرائىنا ئۇرۇشى توغرىسىدىكى باياناتىدا رۇسىيەنى «تاجاۋۇزچى» دەپ ئاتاشقا قارشى چىققان.

نىيۇيورك ۋاقىت گېزىتىنىڭ 21-فېۋرال خەۋەر قىلىشىچە، ئامېرىكا يەتتە دۆلەت گۇرۇھىنىڭ رۇسىيەنىڭ ئۇكرائىناغا تاجاۋۇز قىلغانلىقىنىڭ ئۈچ يىللىقىنى خاتىرىلەش ئۈچۈن تەييارلاۋاتقان باياناتىدا رۇسىيەنى «تاجاۋۇزچى» دەپ ئاتاشقا قارشى چىققان. بۇ قارشىلىق پىرېزىدېنت دونالد تىرامپنىڭ يېقىندا ئۇرۇشنىڭ سەۋەبىنى ئۇكرائىناغا ئارتقان باياناتىدىن كېيىن ئوتتۇرىغا قويۇلغان.

G7 نىڭ نۆۋەتتىكى رەئىسى كانادا دەسلەپكى لايىھەنى ئېلان قىلىپ، ئۇكرائىناغا بولغان قوللاش پوزىتسىيەسىنى ساقلاپ قالغان. ئەمما ئامېرىكا لايىھەنى ئۆزىنىڭ مەيدانى بويىچە تۈزىتىپ، ئۇكرائىناغا مايىل دەپ قارىلىشى مۇمكىن بولغان ھەرقانداق سۆزلەرنى ئۆچۈرۈپ، ئاخىردا بۇ مەسىلىدە بىتەرەپ مەيدانىنى بىلدۈرىدىغان باياناتنى شەكىللەندۈرگەن.

بىلدۈرۈلۈشىچە، مەزكۇر باياناتتا رۇسىيە تاجاۋۇزچى ياكى ئۇكرائىنا زىيان تارتقۇچى دەپ ئېنىق بېكىتىلمىگەن. نۆۋەتتە داۋاملىشىۋاتقان سۆھبەتلەر ئۇرۇشنى قانداق سۈپەتلەشنى ئۆز ئىچىگە ئالىدىغان بولۇپ، يەتتە دۆلەت گۇرۇھى باياناتلىرىدا ئىلگىرى ئىشلىتىلگەن «رۇسىيە تاجاۋۇزچى» دېگەندەك ئىبارىلەرنى ئىشلىتىشتىن ساقلانغان.

تەييارلىغۇچى: ئابدۇخەبەر رەجەپ